Керлингшілер жеңісі
18-25 қыркүйек аралығында Алматы қаласында керлингтен Қазақстан чемпионаты өтті. Жарыста Қостанай облысының намысын өңірлік уинверситет студенттері Әділет Қожахмет, Әмина Кәкімжанова, Зарина Сәрсекеева, Маржан Маратова, Марлен Төлендиев және Абай Нұрбаевтан құралған команда қорғады.
Қостанай облысы чемпионат жеңімпазы атанды.
«Ойындар бізге қиын соқты. Қарсыластарымыз да жақсы дайындалған, деңгейлеріміз бір дәрежеде болды. Жарыс барысында барымызды салуға тырыстық. Еңбегіміз ақталып жеңіс бізге бұйырды», – дейді Абай Нұрбаев.
Керлинг – мұз үстінде ойналатын командалық ойын түрі. Жарысқа екі команда қатысып, кезекпен 20 килограмдық тасты алда тұрған нысанға жібереді. Әр команданың капитаны қатысушылардың тасты ату кезегін таңдайды. Алда тұрған нысанаға тасты тигізген команда жеңіске жетеді.
Бұл спорт түрі Еуропа, Америка елдерінде жақсы дамыған. Ал, елімізде бұл спорт енді қарқын алып келеді. Қатысушылардың айтуынша, Алматыда керлинг спорты жақсы дамыған.
Керлингке қатысам деушілер алдымен денені шынықтырып, аяқ пен денеге жақсылап жаттығулар жасау қажет. Физикалық талаптар орындалмай жатып, мұзға шығуға болмайды.
«2021 жылы керлингпен айналысу үшін Алматыда арнайы спорт аренасы ашылды. Облысымызда керлинг спорты енді қанат жайып келеді. Қостанайда керлинг федерациясы алдыңғы жылы ашылды. Биыл қыркүйек айынан 7-9 жастағы оқушыларды қабылдау басталды», – дейді Әділет Қожахметов.
Қаракөз МАҚАТОВА
ҚӨУ студенті
