Достарын еске алды
Жақында Аманкелдіде волейболдан Нұрлыбек Серікұлы мен Саян Ерханұлын еске алуға арналған аймақтық турнир өткізілді. Жарыста алаң иелерімен қатар Арқалық және Жанкелдин ауданынан келген спортшылар бақ сынады.
Турнир өте тартысты өтті. Олай дейтініміз, ә дегеннен-ақ барлық командалар өздерінің жақсы әзірлікпен келгендерін байқатты.
– Бұл турнир алғаш рет ұйымдастырылып отырса да жоғары деңгейде өтті. Жарысты аудан жастарының өздері ұйымдастырды. Олардың бұл игі бастамасын аудан басшылары да қолдады. Мақсат-жергілікті жастарды бұқаралық спортқа баулу, жасөспірімдердің спортқа деген құлшынысын арттыру, – дейді турнирді ұйымдастырушы Аслан Боранбайұлы.
Бір күн бойы турнир көрігін қыздырған командалардың қай-қайсыда осал шықпады. Дегенмен, спортта жеңіс пен жеңілістің қатар жүретіні бар. Алғаш рет өткізілген мемориалдық турнирдің кубогын алаң иелері еншіледі. Ал, қалған жарыс жүлдегерлеріне қаржылай-заттай сый-сияпат жасалды. Алдағы уақытта бұл игі дәстүр жалғасын таба бермек.
Жарыстан соң турнирді ұйымдастырған 2008 жылғы мектеп түлектері марқұм болған достарына арнап ас берді.
Азамат Нұғыманов,
журналист.
