Тарихи маңызы бар сәт

Қазақта "Қонақ келсе, құт келер" деген аталы сөз бар. Олай дейтініміз, ел мерейін өсіретін оқиға болғалы отыр. Ұлт ұстазы Ахмет Байтұрсынұлының 150 жылдық мерейтойы Торғайда думандатылмақ. Бұл – жай ғана мерейтой емес, ізгі істердің ұйытқысы болған, игілікке қарай қадам бастырар сәт. Осы бір тарихи маңызы бар іс-шараға Мемлекет басшысы Қасым-Жомарт Кемелұлы арнайы келіп қатыспақшы.

Ел басшысының келуі – үлкен жаңашылдық пен өзгерістің айқын бейнесі. Себебі халық алғысына бөленген, елдің мұңы мен жоғын жоқтайтын кеменгер тұлғаның қасиетті Торғай даласына ат басын бұруы тегіннен-тегін емес. Бірінші кезекте Алаш арысы Ахмет Байтұрсынұлына деген құрметін аңғарсақ, екіншіден, бұл қастерлі Торғай жұртшылығы елдің, оның ішінде мемлекет басшысының назарында екенінің көрінісі.

Қасым-Жомарт Тоқаевтың Торғай топырағына келуінде үлкен мағына жатқаны сөзсіз. Президенттен күтеріміз көп, ол кісіге артқан сеніміміз қаншалықты жоғары болса, осы жолғы сапарынанда алар әсеріміз ерекше болмақ деп ойлаймын.

Есім ДАУЫЛБАЙ,
Аманкелді аудандық ардагерлер кеңесінің төрағасы.