Орталық Азия мемлекеттері басшылары Консультативтік кездесуінің бірлескен мәлімдемесі қабылданды
Президент Қасым-Жомарт Тоқаев қатысқан Орталық Азия мемлекеттері басшыларының IV Консультативтік кездесуінде қорытындысы бойынша бірнеше маңызды құжаттар қабылданды деп хабарлайды БОРТ№1 Телеграм-арнасы.
Атап айтқанда, жиын соңында Орталық Азия мемлекеттері басшыларының Консультативтік кездесуінің бірлескен мәлімдемесі, Өңірлік ынтымақтастықты дамытудың 2022-2024 жылдарға арналған жол картасы, Орталық Азия мемлекеттерінің көпжақты форматтар аясындағы өзара іс-қимылдар тұжырымдамасы, Орталық Азияға арналған «Жасыл күн тәртібі» аймақтық бағдарламасы қабылданды.
Бұдан бөлек Қазақстан Республикасы, Қырғыз Республикасы, Тәжікстан Республикасы, Түрікменстан және Өзбекстан Республикасы арасындағы Орталық Азияны ХХІ ғасырда дамытуды көздейтін достық, тату көршілік және ынтымақтастық туралы шарт келісілді және оған қол қою рәсімі басталды.
Сонымен қатар Аралды құтқару халықаралық қорының құрылтайшы мемлекеттері басшыларының Аралды құтқару халықаралық қоры президентінің өкілеттіктерін ұзарту туралы шешімге қол қойылды.
