Шешіледі. Өткел бермес өзен емес
Қалада шешімін күтіп тұрған маңызды жұмыстар баршылық. Соның бірі – су бұру жүйесін жетілдіру. Жыл сайын көктемдегі қар еру, жаздағы жауын-шашын кезеңдерінде көшелерді, жол өткелдерін су басып, жүргізушілер мен тұрғындарға ыңғайсыздық тудырып жүр. Осы жағдайға қатысты қала әкімдігіне арыз-шағымдар жиі түсіп тұрады.
Қостанай қаласының әкімі Марат Жүндібаев басшылық лауазымына кіріскелі осы мәселеге ерекше назар аударып келеді. Ағын суға қарсы жоспарланған жұмыстар аясында шаһар басшысы көпшілік шағым айтатын жолдарды аралап көрді. Сондай жолдардың бірі – Назарбаев даңғылы бойындағы көпірдің асты. Жаңбыр төгіп салса, сол маңай суға толады да қалады. Осы жылы қаражат қарастырылып, 2023 жылы «Жастар сарайынан Рабочая көшесіне дейін нөсер кәрізін қайта жаңарту» сметалық құжат жобасы әзірленетін болды. Жоба еріген қар және жаңбыр суы кедергісіз ағып кететіндей етіп жасалады. Осылайша жол өткелін су басуға жол берілмейді. Сонымен қатар, күзгі-көктемгі кезеңде Юбилейный шағын ауданында тұрғынжай аумағын су басуын болдырмауға арналған нөсер кәрізінің құрылысы жалғасып жатыр.
«Әрине, бұл бағытта қысқа мерзім ішінде жылдар бойы қордаланған барлық мәселелерді шешу мүмкін емес. Бізге облыс орталығының су басуы мүмкін барлық жерлері белгілі. Олар: Әуежай, ПТСТР жол өтпелері, Қостанай-2 шағын ауданы, солтүстік-батыс кварталы, «Дружба» тұрғын массиві және т.б. аумақтар. Осы маңдарда қолданыстағы кәріз жүйесі жауын су ағынын уақытылы өткізіп үлгермейді. Осыған байланысты мәселелерді жедел шешу және су тасқыны кезеңінде қолда бар ресурстарды ұлғайту үшін су сорғыштар сатып алуды жоспарланып отыр. Биыл тамыз айында жаңбыр, еріген және ағын суларды сорып алу үшін, сондай-ақ өрт сөндіруге жарамды МП-300 шассиіндегі (өнімділігі сағатына 300 текше метр) екі жылжымалы мотопомпа сатып алынады», – деп мәлім етті қала әкімдігінің баспасөз хатшысы Самат Жанділдин.
Су бұру – тұрғын үй, коммуналдық шаруашылық саласы үшін маңызды жұмыс. Қала әкімдігі оны әлеуметтік сала, құрылыс, инфрақұрылымды дамыту әрі күтіп ұстау, қаланы абаттандыру сияқты өзекті мәселелерімен қатар кезең-кезеңімен шешетінін айтып отыр.
Қала басшысы Instagram-дағы парақшасында осы бағыттағы жұмыстар туралы ақпарат жариялаған еді. Бұл мәселеге бейжай қарамайтын тұрғындар оған біраз пікір жазып қалдырды. Мәселен, Бәке есімді желі қолданушы өзі тұратын аумақтағы жағдайды жайып салыпты.
«Құрметті Марат Қонысбайұлы, сіз келгелі қалада нөсер кәріздері жасала бастады. Бұл үлкен мәселемен, әсіресе көктемде, қар еріген кезде немесе қатты жаңбыр жауғанда бетпе-бет келеміз. Карбышев көшесі, 91 мекенжайында нөсер кәрізі болған еді. Ол бұрынғы «Форум» дүкенінің (қазір «Бақыт» медициналық орталығы) жанынан өткізілген. Ағын су Чкалов көшесін бойлай табиғи арнамен төмен қарай кететін. Кейін, ауысқан меншік иесі ТКШ бөлімі рұқсат берді деген желеумен кәрізді бітеп тастады. Қазіргі уақытта жаңбыр суы Карбышев көшесіндегі жол жамылғысын бұзып, жаяу жүргіншілер мен көліктерге кедергі келтіріп тұр», – депті ол. Әкім аталған мәселені назарға алатынын жазыпты.
Пікір білдірген басқа да тұрғындар М.Жүндібаевтың жұмысына сәттілік тілеп, бастаған жұмысты аяқсыз қалдырмайтынына сенім білдірген.
Бұдан бөлек, Марат Жүндібаев жақында болған жауын-шашынның зардабы жөнінде де жариялады. Бірақ онда кәріздер мәселесі емес, табиғи құбылыстың зардабы жайында жазылды.
Еске сала кетейік, «Ikomek» ахуал орталығына сол күні 442 қоңырау келіп түскен, оның 271-не мамандар әртүрлі кеңес берді. Жүзге жуық ағаш бүлінген. Коммуналдық қызметтер ауа райының қолайсыздығынан келген зардапты тез арада жойды. Оған 3 мердігерлік ұйым, 55 бірлік техника және 180 адам жұмыс күшін жұмылдырды. Аумақтардан 360 текше метр қоқыс шығарылған. Тұрғындар арасында зардап шеккендер мен қаза тапқандар жоқ.
«Зеленая көшесі, 25/1 А блогы көппәтерлі тұрғын үйдің 7 және 9 қабаттарында балкон қоршаулары зақымданды. Менің тапсырмам бойынша тиісті әкім орынбасары құрылыс бөлімінің басшысымен, қаланың бас сәулетшісімен бірлесіп, мердігер мен мамандарды тарта отырып, аталған нысанға тексеру жүргізді. Зақымдалған элементтер қалпына келтірілді, қазір қауіп жоқ. Тексеру нәтижелері бойынша мердігер 6-дан 9-қабатқа дейін балкон қоршауларынының кірпіш қатарларын күшейту туралы шешім қабылдады. Сондай-ақ, Мемлекеттік сәулет-құрылыс бақылау басқармасына тұрғын үйлердің құрылыс нормаларына сәйкестігін тексеру туралы хат жолданды», – деп жазды әкім.
Суреттерді түсірген Бағдат АХМЕТБЕКОВ.
