Облыс әкімдігі алдыңғы орында
Мемлекеттік қызмет көрсету сапасы жөнінен Қостанай облысының әкімдігі жоғары тиімді деңгейге жетті. Барлық санат бойынша 98,7 балл жинаған Қостанай облысы республикалық рейтингте екінші орынға ие болды.
Бұл туралы бүгін, 8 шілде күні облыс әкімінің қатысуымен өткен отырыста ақпараттандыру, мемлекеттік қызметтер көрсету және архивтер басқармасының басшысы Азамат Кашиев хабарлады.
Биылғы маусымнан бастап мемлекеттік қызметтер тізіміне жаңа өзгерістер мен толықтырулар енгізілді, енді жергілікті атқарушы органдар көрсететін қызметтер 2 есеге көбейді. Қазір қызметтердің 290 атауы бар.
Облыстың мемлекеттік қызмет саласындағы тағы бір жетістігі – "халықтың мемлекеттік қызмет көрсету сапасына қанағаттану деңгейі" көрсеткіші. Қанағаттану деңгейі өңірде 89,6% деп бағаланып отыр, бұл көрсеткіш бойынша облыс республикада бірінші орын алды.
Азамат Кашиевтің айтуынша, өткен бағаланатын кезеңмен салыстырғанда облыс әкімдігінің қызметіне қанағаттану деңгейінің жақсарғаны байқалады, өсу серпіні – 13,2%.
Айта кету керек, бүгінге дейін облыстың қызмет көрсетуші органдары 4 млн 770 мыңнан астам қызмет көрсетті, оның ішінде электронды түрде 4 млн 706 мың қызмет немесе көрсетілген қызметтердің жалпы санының 98,6%.
