Мың домбырашы күй тартты

Ұлттық домбыра күніне орай Арқалықта алғаш рет «Домбыраның күмбірі – бар қазақтың бірлігі» атты шарада мың домбырашы бір мезетте күй тартты.

Қаланың «Жігер» стадионында, ашық аспан аясында мың домбырашы халық күйлері «Тепеңкөк» пен «Салкүрең», Н.Тілендиевтің «Әлқисса», Н.Ахметбековтің «Жеңіс», Құрманғазының «Балбырауын» күйлерін орындады.

Еске сала кетсек, осыдан үш жыл бұрын көршілес Аманкелді ауданында «Мың домбыра» шарасы бастау алып, бір мезетте мың домбырашы екі күй орындап рекордтар кітабына енген болса, бұл игі дәстүр биыл Арқалық қаласында жалғасын тауып отыр.

Қала және қалаға қарасты ауылдардың жастары, мектеп оқушылары, жалпы түрлі сала өкілдерінен құралған мың домбырашы бір саптан табылды. Оларды біріктірген бір ғана нәрсе – қасиетті домбыраға деген құрмет, төл аспабымызға деген қызығушылық.

Осы іс-шара аясында оқушылардың дені алғаш рет домбыра үйренгенін атап өтуге болады. Осылайша арқалықтықтардың ұрпаққа ұлттық аспабымызды насихаттау мақсаты орындалып отыр. Қатар шыққан мың домбыраның қоңыр үні керемет үйлесім тауып, жиылған қауым ерекше әсер алды.

"Жыл басында қала әкімінің мұрындық болуымен ұйымдастырылған "Домбыра сыйла" акцияның арқасында біраз жерлестеріміз бір-біріне киелі аспап тарту етіп, көңілдері қуанышқа толды. Бүгінгі таңда арқалықтықтардың бәрінің болмаса да, басым бөлігінің төрінде қазақтың қара домбырасы тұр десек, қателеспеспіз. Соңғы жартыжылдықта қаламызға келген қонақтардың "көшелеріңізде домбыра ұстаған адамдар көп екен" деп таңғалғанын да талай естідік. Биыл біздің шаһарымызда ең жиі айтылған сөз де "домбыра" болса керек. Қазақ пен домбыра – егіз ұғым. Осындай игі істер арқылы еліміздің бірлігі күшейіп, абыройы өсе берсін!", –дейді АМАNАТ партиясы Арқалық қалалық филиалының атқарушы хатшысы Сабыржан Тасмағанбет.

Іс-шарасының ең егде жастағы қатысушысы, тоқсанның төріне қадам басқан Кәки Ақан ақсақалға, ең жас қатысушы Мейіржан Қабиденге (8 жаста), шараға 22 домбырашы болып қатысқан Бөлтіріковтер әулетіне, мың домбырашыға дирижерлік жасап, осы шараның өтуіне зор үлес қосқан ҚР Мәдениет қайраткері, Арқалық қаласының құрметті азаматы Боранбай Әбеновке арнайы сыйлықтар тапсырылды.

Бұл бірнеше ай бойы жүргізілген дайындықтың жемісі. Осы ретте қала әкімі Әмірхан Асанов шараның өтуіне атсалысқан қалалық Б.Байқадамов атындағы музыка мектебінің ұжымына, Н.Құлжанова атындағы Торғай гуманитарлық колледжіне, өзге де оқу орындарының, мекемелердің басшыларына, мектептердегі домбыра үйірмелерінің ұстаздарына, ауыл әкімдері және ауылдық жердегі мәдени ұйымдастырушыларға, бизнес өкілдері мен шаруа қожалықтарының басшыларына демеушілік жасап, қолдау көрсеткені үшін алғысын білдірді. 

Мұрат ЖҮНІСҰЛЫ
Арқалық қаласы.