Селодағы серпінді істер

Облыстың әр елді мекендеріндегідей Әулиекөл ауданында да көктемгі, күзгі санитарлық тазарту, көркейту, көгалдандыру, жарықтандыру жұмыстары жақсы жолға қойылған. "Жұмыла көтерген жүк жеңіл" демекші, аудан тұрғындары да көктемгі және күзгі санитарлық тазарту жұмыстарына белсене қатысып, сенбілік жұмыстарын тыңғылықты атқарып отырады.

Әулиекөл селосының әкімі Досбол Құсайыновтың айтуынша, көгалдандыру мен абаттандыру жұмыстарына және селоның санитарлық тазалығына аудан бюджетінен биыл 14 млн.800 мың теңге, ал жарықтандыру жұмыстарына 6 млн. теңге бөлініпті.

– Жалпы, аудан бойынша бір саябақ  пен төрт сквер бар. Соларға жыл сайын ағымдағы жөндеу жұмыстары жүргізіліп отырады. Бүгінде сол саябақтарды көгалдандыру, абаттандыру жұмыстары жүріп жатыр. Ондағы орындықтар мен субұрқақтарды, шағын архитектуралық мүсіндер-ді сырлап, әктеу жұмыстары да назардан тыс қалған емес. Село бойынша көктем кезінде 600 түп ағаш отырғыздық, енді күз кезінде тағы да 400 түп ағаш егуді жоспарлап отырмыз. Жиырма қоғамдық жұмыскеріміз бар, олар күн сайын негізгі көшелерді жинастырады. Ал, қосымша көшелерді аптасына бір рет жинап, күл-қоқыстардан тазартып отырамыз, – дейді   Досбол   Төлеуханұлы.

Ауданда жеке және мемлекеттік мекеме, кәсіпорын аумақтарының тазалығына да ерекше мән беріледі. Аптаның әр бейсенбісі сайын әр мекеме қызметкерлері мен аудан тұрғындары өздеріне тиесілі жерді күл-қоқыстардан тазартып отыруды дәс-түрге айналдырған десе де болады. Ал, аудандағы "Әулиекөл сервис" жауапкершілігі шектеулі серіктестігі осы қоқыстарды, тұр-мыстық қалдықтарды шығаруға ғана атсалыспай, аптасына бір рет көшелерді сыпыру жұмыстарын да атқарады.

Жасыратыны жоқ, аудан орталығындағы көше жолдарының дені сын көтермейді.  Дегенмен, аудан басшылары да бұған бей-жай қарап отырған жоқ. Ауданішілік жолдарды айнадай жарқыратып, жаңартпаса да, жамап-жасқау жұмыстарын жүргізу-ді қолға алуда. Биыл сондай жолдардың бірсыпырасы жөнделіп, 15 жол белгісі қойылыпты. 1500 шаршы метрлік шұрық-тесік жолдар жөнделіп, ойылып, шұңқыр болып қалған жерлерге 250 текше метр топырақ төгіліп, тегістелген. Бұл жұмыстарға 7 млн.500 мың теңге жұмсалыпты. Бүгінде Байтұрсынов, Алтынсарин, Октябрь, Гагарин, Пролетар сияқты барлығы 13 көше жөнделген. Бірақ, әлі де жөндеуді қажет ететін көше жолдары жетіп артылады.

– Қазіргі күні аудандағы Мамедова, Автомобилист, Қостанай, Торғай, Затобол, Дорожная, Ер-кімбаев, Степная сияқты көшелердегі жолдар жөндеуді қажет етіп  отыр.  Мәселен,  Степная сияқты шет жақтағы көшелерді әсіресе қыста қар, жазғытұрым кездерінде су басып, тұрғындарды әбігерге салып жататыны жасырын емес. Асылы, ондай көшелерге асфальт төсеп, жаңа жол салу мүмкін емес, оған қыруар қаражат қажет. Тек, жамап-жас-қау, тегістеу сияқты жұмыстар жүргізуге ғана мүмкіндік бар. Сондықтан, алдағы уақыттарда осы көшелерді бірте-бірте жөндеу жұмыстары қолға алынбақ.  Сондай-ақ, биыл аудандағы жеті көлдің екеуіне күл-қоқыстан тазалау жұмыстары жүргізілді. Алдағы уақытта 1 Май көшесіндегі көпірді жөндеу жоспарланып отыр. Ал, су мәселесіне келер болсақ, 2009 жылы село ішіне су құбыры тартылған болатын. Бірақ, барлық көшені сумен қамту мүмкін болған жоқ. 2016 жылы "Ақбұлақ" бағдарламасы бойынша екінші транш арқылы біздің ауданға қаржы бөлінеді деген жоспар бар. Сонда қамтылмаған басқа көшелерге су тартылатын болады. Бүгінде әр үйде скважина, көше бойларында құдықтар да бар, сондықтан ауыз судан айтарлықтай проблема жоқ, – дейді село әкімі Д.Құсайынов.

Қарлығаш

        ОСПАНОВА

Әулиекөл ауданы.

Суреттерде: Әулиекөл селосының әкімі Д.Құсайынов; жаңа аялдамалар саны артып келеді; қоғамдық жұмыскерлер жұмыс үстінде.

Суреттерді түсірген автор.