Қостанайлық педагог Бас жүлдені иеленді
Қазақ тілінен сабақ беретін оқытушылар арасындағы «Тіл мерейі» республикалық байқауында қостанайлық педагог Айткүл Доспанова бас жүлдені жеңіп алды.
Аталмыш байқау қазан айының 23-24 жұлдызы аралығында Астана қаласында өтті. Оған облыстық байқауларда жеңіп шыққан 16 оқытушы қатысқан. Оқытушылар «Өзін-өзі таныстыру», «Электронды портфолиосын қорғау», «Тәжірибелік сабақ үлгісін көрсету», «Педагогикалық-психологиялық жағдаяттарға жауап беру» сияқты төрт кезеңнің тапсырмаларын орындады. Әділқазылардың шешімімен байқаудың бас жүлдесін Тобыл өңірінің төл перзенті Айткүл Доспанова иеленді. Жеңімпаз оқытушы екі жылдан бері Қостанай облыстық тілдерді оқыту орталығында жұмыс істейді.
-Байқауға қатысқанымда жүлделі орындардың бірінен үміттенгенім рас. Бірақ бас жүлдені аламын деп ойламаған едім. Танымайтын аудиторияда өз білгенімді дәлелдеп, ақтап шыққаныма қуаныштымын. Мұндай байқау адамның шыңдалуына көмектеседі,-деді жеңімпаз оқытушы Айткүл Доспанова.
Қымбат Досжанова
Суретті түсірген Айбек Жүзбай
