8 адам газдан уланды
Алтынсарин ауылында моншада иіс тиіп уланған 8 адам ауруханаға жатқызылды. Олардың ішінде бесеуі – балалар. Бұл туралы облыстық ТЖД баспасөз қызметінен хабарлады.
Аталмыш ведомствоның өкілі хабарлағандай, облыстық аурухананың қабылдау бөлмесіне Алтынсарин ауылынан иіс тиіп уланған 8 адам, соның ішінде бес бала түскен. Зардап шеккендер дәрігерлерге моншаға барғандарын, содан кейін өздерін жайсыз сезінгендерін айтқан. Жедел жәрдемді олар өздері шақырған.
Қазіргі уақытта ауруханаға түскендердің бірі әйел адам ауруханада дәрігерлердің бақылауында, екеуі үйлеріне жіберілді. Барлық бес бала «орташа деңгейдегі улану» диагнозымен Қостанай қалалық балалар ауруханасына ауыстырылды.
