Молшылық мерекесі: мамандарға марапат

by Qostanaı tańy · 21.11.2017

Меңдіқара ауданының Соснов селолық округіне қарасты "Қарқын" ЖШС ауыл шаруашылығы қызметкерлерінің күнін атап өтті. Шара аясында үздік мамандар марапатталып, сала ардагерлеріне құрмет көрсетілді. Тоқшылықтың нышаны іспетті тойға облыс өнерпаздары сән берді.

Мұндай мерекеге шаруасы қарқындаған, астығы алтын болған Харьков елді мекені алғаш рет куә болып отырған жоқ. "Қарқын" ЖШС шаруалары табысты еңбектің тойын дәстүрлі түрде ауылдастармен бөліседі. "Үлгілі ауыл, дүлдүл ауыл" биыл да жылды жаман қорытындылаған жоқ. Қамба нанға, өріс малға толды. Мерекеге өзге де себептер жоқ емес. Бұл туралы ҚР Еңбек Ері, серіктестіктің негізін қалаушы, Қостанай облысының, Меңдіқара ауданының құрметті азаматы Сайран Бұқанов тілге тиек етті.

– "Қарқын" ЖШС бүгінгі таңда еңселі шаруашылыққа айналды. Меңдіқара ауданының ғана емес, облыс экономикасының дамуына қосқан үлесі бар. Танымал, тегеурінді, өз дәстүрі орныққан, мамандары білікті серіктестік. Жалпы, менің директорлық тізгінді балама бергеніме 2 жылдай болды. Ол өз ісін біледі. Өрге бастыра береді деп сенем. Ал мен бүгінгі мереке аясында әріптестермен қимастықпен қоштасуды жөн санадым. 37 жыл уақыт ішінде еңбегіме адал болдым деп ойлаймын. Жүрілген жолды, атқарылған істі тізбектеп жатпайық. Мереке құтты болсын", – деді Сайран Балкенұлы.

Ол құттықтау лебізінен соң көрермен залының алдыңғы қатарында отырған бұрынғы қызметшілер, бүгінгі еңбек ардагерлеріне сый-сияпат жасады. Қариялар былайғы уақытта да құрметтен кенде емес – серіктестік есебінен отын-су тегін түсіріліп береді. Бұл жолғы демеу де еңбеккерлердің көңіліне жылу ұялатқандай.

-Саналы ғұмырым ауыл шаруашылығы саласына арналды. Жарты ғасырға жуық еңбек жолымның 34 жылында Сайран Балкенұлымен қызметтес болу ғанибеті бұйырды. "Қарқын" ЖШС-де механизатор болып жұмыс істедім. Білікті басшы, кең пейілді азамат ретінде білемін Сайранды. Ауылдастарының алғысына бөленген жан. Бүгінгі көрсеткен ізгілік-ілтипаты үшін де рахмет айтамын, – дейді біз әңгімеге тартқан ауыл тұрғыны, зейнеткер Ержан Изабеков.

Жалпы, шаруашылықтың өркенді ісі, кешегісі мен бүгіні жайлы сыр шертпек үшін сахна төріне сала білгірлері, аудандық басшылық өкілдері, өңір кәсіпкерлері шақырылды. Қазіргі директор Еркін Сайранұлы да серіктестіктің тыныс-тіршілігінен мағлұмат берді.

-Биылғы ауа райы анағұрлым қолайлы болды десек те, бидай ору ісі ешқашан оңай болған емес. Сондықтан бел жазбай еңбек еткен әрқайсысыңызға рахмет. Осы жолы облыстық көрсеткішті еселеп, гектарына 22 центнерден астам астық жинадық. Мал шаруашылығы мен құс өсіру бағытындағы жұмыстар да нәтижесіз емес. Шаруамыз алға баса берсін, бұл сіздердің мерекелеріңіз,-деді Е.Бұқанов.

Салтанатты шара аясында шаруашылықтың қызметкерлері "Үздік бас маман", "Үздік жүргізуші", "Үздік механизатор", "Үздік бақташы" сынды аталымдар бойынша марапатталып, бағалы сыйлықтарға ие болды. Еңбекшілердің тағы бір парасына аудан әкімінің алғыс хаттары табысталды.

Ал мерекеге куә болған ауылдықтардың көңілін Е.Өмірзақов атындағы облыстық филармонияның өнерпаздары ән-күймен көтерді. "Ақжелең" ансамблі бастаған, күміскөмей әншілер қостаған өнер ұжымдары шараның сәнін кіргізді. Өнер тұрғысынан аудандық мәдениет үйінің қызметкерлері де атсалысқанын айта кеткен жөн.

Салтанат соңы банкетке ұласып, мереке иелері мен қадірлі қонақтар дәмнен ауыз тиді. Ақ шаңырақ астында, ақ дастархан үстінде ірі бастылар лебіз сөйледі. Ауыл шаруашылығының елдің әл-ауқатын арттырар, экономиканың күретамырына баланатын сала екендігі сөз етілді. Сондай-ақ, еңбеккерлер бұл мерекені "Қарқын" ЖШС-нің тарихына таңбаланатын кезекті бір келелі шара десті.