Үміт зор, сенім мол
Бүгінгі ҚР Мәжілісі отырысындағы ел Президенті Қ.Тоқаевтың үндеуінде көптеген күрмеулі мәселе көтерілді. Мемлекет басшысы кей тұстарда батырыңқырап та айтты. Шынымен, оның бәрінен хабары бар, барлығын көріп-біліп отыр. Айыптылардың аты-жөндерін жария етпеуді жөн санаған секілді. "Үй сыртында кісі бар" қағидасымен елдің ішкі мәселесін тысқа әшкере қылғысы келмеген болар деп ұқтық. Бастысы, себептер сараланып, салдарына нақты баға берілді. Сондай-ақ, ол Қытай шекарасындағы бейберекеттіктің артында кім тұрғанын білетінін сөз еткенде, жалпы осы мәселеге тоқталғанда өзім қуанып қалдым. "Қазақ-Қытай шекарасындағы бардакты бәріміз білеміз. Миллиардтаған ақша мемлекетке түспей, сот жүрмейтін адамдардың қалтасына кетіп жатыр" – деді Тоқаев бұл тұрғысында. Осы бассыздықтан зардап шеккендердің бірі менмін. Қытай шекарасында тамыз айынан бері 30 мың доллардың қосалқы бөлшектері тұр. Тапсырыспен алған тауарларым карантин шараларына байланысты әлдебір қоймаға жөнелтіліп, жоғалып кетіпті-міс. Мен оған сенбеймін. Ақыры, қосалқы бөлшектерді Мәскеуден, Германиядан тапсырыспен алдыруыма тура келді. Тіпті, Қытайдан алдырмақ болған тауар құны негізсіз екі есеге өсіп кеткені тағы бар. Сондықтан, жаңа Премьер-министр осы мәселемен шұғылданады деп сенемін. Өйткені біз тартып отырған залал, қомақты шығын – кейінге ысыруға болмайтын мәселе.
Есімізде, Әлихан Смайылов вице-премьер болып тұрғанда осы түйткілмен таныс екенін, осы жазда қытай билігімен байланысқанын мәлімдеген-ді. Бірақ мәселе аяқсыз қалған тәрізді. Енді осы жайтты соңына дейін жеткізуге бел шеше кірісер деген үміттеміз. Президент берген тапсырмаларды билік өкілдері дәл қазір реттеуге кірісетін міндеттеме деп түсінсе дейміз.
Бұдан бөлек, ел азаматтарының көбін толғандырған утильдеу мәселесіне ден қойылғаны да мені қуантты. Инфляция дәлізін 3-4% көлеміне шақтау дегеніміз – барлық алыпсатарлық ареналарына тықыр таянады деген сөз. Сондай-ақ, әкім, депутат, министрлер жалақысына 5 жылға мораторий жарияланатыны да бекер айтыла салған сөз емес. Өйткені, жасыратыны жоқ, биліктегілердің табысы халықтың "қытығына" тиетін факторлардың бірі еді. Күштік құрылымдар реформасы жасалатынын да жақсы жаңалыққа балар едім. Құқыққорғау, арнайы қызмет жүйелерінде қордаланған мәселе көп екенін, өкінішке қарай, елдегі күрделі жағдай көрсетіп берді…
Негізі, Қ.Тоқаев көптеген маңызды шараларды тілге тиек етіп, министрліктердің, жергілікті атқару органдарының, ұлттық компаниялардың алдына қыруар тапсырма жүктеді. Демек, оларды жүзеге асыру бүгіннен басталуы керек. Бір тәнті болғаным, мемлекет басшысы өзін қауқарлы, батыл, жылдам әрекет қылушы адам екенін таныта алды. Қабілетті басшымызға қолдау білдіру – еліміздің дамуына үлес қосуға даярлығымыздың белгісі.
Зарина Көкжанова,
"Жас Атамекен" жас кәсіпкерлер клубының төрайымы
