Облыс әкімі қостанайлықтарға алғыс айтты

Облыс әкімі Нұралы Садуақасов шаһардағы кәріз коллекторындағы ірі апат барысында түсіністік танытқан тұрғындарға алғыс білдірді.

Өткен аптада қаладағы бірқатар шағын аудандардың тұрғындары ауызсусыз қалған еді. Көпқабатты тұрғын үйлерде бір апта бойы су берілмеді. Оған кәріз коллекторындағы ірі апат себепші болған. Апатты жою мақсатында қажетті техника мен «Қостанай су» кәсіпорнының жөндеу бригадалары жұмылдырылды. Дүйсенбі күнгі аппарат мәжілісінде өңір басшысы апат салдарынан сусыз қалған тұрғындарға сабырлылық сақтап, түсіністік танытқандары үшін алғыс айтты.

-Қазіргі уақытта апаттың алдын алдық. Ендігісі қалалық әкімдік пен коммуналдық қызмет мамандары апаттың туындау себебін анықтауы тиіс. Апатқа құбырлардың ескіруімен қатар ауа температурасының күрт төмендеуі де себеп болғаны анық. Сондықтан бүгіннен бастап мұндай апатты болдырмауды ойлауымыз керек. Ол үшін нақты жоспар қажет,-деді облыс әкімі Нұралы Садуақасов.

Қымбат Досжанова