Тіл білу – заман талабы
Елбасымыз Н.Ә.Назарбаев Қазақстан халқына Жолдауында қазақ тілінің және тілдердің үштұғырлығы мәселесіне кеңінен тоқталып, "Қазақ тілі – біздің рухани негізіміз… Біз қазақ тілін жаңғыртуды жүргізуге тиіспіз… Қазақстанның болашағы – қазақ тілінде. Қазақ тілі 2025 жылға қарай өмірдің барлық саласында үстемдік етіп, кез-келген ортада күнделікті қатынас тіліне айналады…" дей келе, "Қазір біз балаларымыз қазақ тілімен қатар орыс және ағылшын тілдерін де белсенді меңгеру үшін жағдай жасауға шаралар қабылдап жатырмыз" деп, бүгінгі таңда тілдерді дамыту мәселесі мемлекеттік деңгейдегі міндет екенін де атап көрсетті. Сондай-ақ, Елбасының "Үштіл-ділік мемлекеттік деңгейде ынталандырылуы керек. Орыс тілін білу – біздің ұлтымыздың тарихи артықшылығы екені баршаға белгілі… Біз ағылшын тілін игеруде серпіліс жасауымыз керек. Қазіргі әлемнің осы "лингва франкасын" меңгеру біздің еліміздің әрбір азаматына өмірдегі шексіз жаңа мүмкіндіктерді ашады" деген сөздері арқылы тілдердің үштұғырлы саясатының маңызы зор екенін аңғару қиын емес.
Аталмыш бағдарламаны іске асыру барысында "Қарабалық ауданы әкімдігінің тілдерді оқыту орталығы" КММ біраз жұмыстар атқарып жатыр. 2014 жылдың ақпанынан бастап мемлекеттік тілмен қатар ағылшын тілі оқытыла бастады. Уақыт тауып, оқимын, үйренемін деушілерге орталықта барлық жағдайлар жасалған. Орталық тек оқытумен ғана шектелмей, тілдерді насихаттауға бағытталған іс-шаралар да өткізеді. Жыл сайын дәс-түрлі Қазақстан халқының тілдері күні аталып өтіледі. Мемлекеттік тіл күніне орай "Мемлекеттік тіл – менің тілім" атты іс-шара ұйым-дастырылды. Байқауға әртүрлі қызмет саласының өкілдері: мектеп оқушылары, колледж студенттері, аудандық аурухана қызметкерлері және көрші ауылдардан келген қонақтар болды. Байқаудың нәтижесі бойынша І орынды орталық аудандық ауруханасының қызметкері – Мельникова Яна, ІІ орынды Қазақстан агро-техникалық колледжінің студенті – Патрушев Артур, ІІІ орынды – №2 Қарабалық орта мектебінің оқушысы – Кропычева Диана иеленді. Барлық байқауға қатысушылар мадақтамамен және бағалы сыйлықтармен марапатталды.
