Жауапкершілік зор
Мемлекет басшысы Қасым-Жомарт Тоқаев «Жаңа жағдайдағы Қазақстан: іс-қимыл кезеңі» атты биылғы халыққа Жолдауында қолжетімді әрі сапалы білім төңірегінде келелі мәселе көтерді. Жолдауда айтылған маңызды мәселе – мамандардың негіздеуінше, мемлекеттің тек дарынды оқушыларды қолдауы балалар арасында әлеуметтік ара-жікті ұлғайтуы мүмкін. Бұған жол беруге болмайды. Осыған орай, мемлекет қарапайым мектептерге қолдау көрсетеді. Сонымен бірге бұл қадам қала мен ауыл арасындағы білім беру саласындағы алшақтықты қысқартуға жол ашады.
Жолдауда келтірілгендей, кәсіпкерлердің жаңа буынын қалыптастыруға басымдық берілмек. Сол себепті «Кәсіпкерлік негіздері» пәні мектептен бастап жоғары оқу орнына дейінгі барлық білім беру сатысында оқытылуы керек. Сондай-ақ, өскелең ұрпақтың спорттық және шығармашылық әлеуетіне аса назар аудару қажет. Бұқаралық спортқа, дене тәрбиесіне және балаларға басымдық берілген жөн. Әр облыста, ірі аудан орталықтарында спорт үйірмелерін ашу маңызды. «Балалар үйірмесі» қызметін қайта қалпына келтірілсе, онда жастарымыз қолөнердің және шығармашылықтың бастапқы негіздерімен танысар еді. Балалар үшін қатерлі бүгінгідей аумалы-төкпелі заманда олардың күш-жігері мен қызығушылығын дұрыс арнаға бағыттау аса маңызды. Бұл – Президент айрықша назарға алған жауапкершілік.
Мемлекет басшысы басты назарда ұстап отырған жайт – білім алудағы денсаулық қауіпсіздігі. Бүгінгі таңда коронавирус індетінің салдарынан дүниежүзіндегі мектеп оқушылары мен студенттердің басым көпшілігі қашықтан оқуға көшкенін баса айтты. Сапалы білім алу үшін әдеттегідей сабаққа қатысып, мұғалімдермен және сыныптастармен араласудың орны бөлек, сондықтан санитарлық талаптарды сақтай отырып, білім алудың қалыптасқан дәстүрлі тәсіліне қайта көшудің тәртібін әзірлеген жөн екенін жеткізді.
А.Қоңқабаев атындағы жалпы білім беретін мектебі өткен жылы төтенше жағдай жарияланғаннан бері дәстүрлі оқыту форматын жалғастырып келеді. Мектепте карантиндік шектеулерге байланысты барлық санитарлық-эпидемиологиялық талаптар қатаң сақталған. Бетперде кию режимі, күнделікті оқушылар мен ұстаздардың дене қызуын тексеру, ара-қашықтықты сақтау, сабақтар арасындағы үзілістер кезінде сыныптарды желдету, кабинеттерді дезинфекциялау қатарлы шаралардың барлығы қолға алынған. Тазалық ережелерін бұлжытпай орындаудың арқасында мұғалімдер арасында да, оқушылар арасында да коронавирус індеті таралмады. Және оның өршуіне жол бермейміз.
Президент өз сөзінде мұғалімдердің еңбекақысы алдағы уақытта да арта беретінін айтты. Бұл ұстаздар қауымы үшін зор қуанышты жаңалық болғаны рас.
Ең бастысы, адамды және қоғамды уақыт талабына сай жетілдіру қажеттігін өмірдің өзі көрсетіп отыр. Жаңарған ұлт қана жаңғырған елдің жетістігін жаһан жұртына таныта алады. Ұлтымыз жаңа сапаға көшуі үшін біздің күнделікті өмірлік ұстанымдарымыз да өзгеруі керек. Мемлекет басшысы айтқандай, ХХІ ғасырдың ұрпағы терең білімді болғаны жөн, жас буынды ерінбей еңбек етуге бейімдеу қажет, кез келген істі кәсіби дағды арқылы жүзеге асырған дұрыс әрі темірдей тәртіп және жоғары жауапкершілік баршамыздың бойымызда болуы керек.
Мейрамғали Қоңқабаев,
«Жанкелдин ауданы білім бөлімінің А.Қоңқабаев атындағы жалпы білім беретін мектебі» ММ директоры.
