Мерейлі, Өнегелі, Парасатты
Қостанайда «Мерейлі отбасы» ұлттық байқауы облыстық кезеңінің жеңімпаздары марапатталды. Биылғы конкурста бақ сынаған 126 отбасы ішінен үш әулеттің есімі ерекше аталды.
Қостанай облысында бұл конкурс жетінші жыл ұйымдастырылды. Мәртебелі сынға жалпы саны 700-ден астам отбасы қатысыпты, оның ішінде осы жылы 126 әулет үміткер болды.
Облыс орталығында өткен салтанатты жиынға 20 отбасы шақырылды. Оларды облыс әкімінің орынбасары Ерлан Спанов құттықтап, ел бірлігінің берік, тірлігінің берекелі болуы отбасындағы мықты тәрбиеге байланысты екенін атап өтті.
Биыл байқаудың облыстық кезеңінің жеңімпаздары 3 номинация бойынша анықталды. Қостанай ауданы атынан қатысқан Батырбаевтар спорттағы жетістіктерімен дараланып, «Өнегелі отбасы» атанса, Денисов ауданынан келген көпұлтты жанұя Бабамурадовтар «Парасатты отбасы» номинациясын иеленді. Ал «Мерейлі отбасы» атағы Жітіқара ауданындағы Тұрсыновтар шаңырағына бұйырды. Жеңімпаз болған отбасының басты ерекшелігі – көп балалы әрі шығармашыл.
«Бірінші бақыт – татулық. Үлкенге құрмет көрсету де біздің үйдегі бұлжымас ереже. Махаббат салтанат құрмаған шаңырақта береке тұрақтамайды. Әкеміз бен анамыз балаларына ешқашан қатты ұрысып көрген емес. Біздің де ұл-қызымыз солай өсіп келеді», – дейді отбасындағы ортаншы бала Асылбек Тоқтарбайұлы.
Әулет бәйтерегі Тоқтарбай Тұрсынов – Жітіқара ауданының құрметті азаматы. Жұбайы Айжан Есенболқызы екеуі алпыс жыл отасып, үш ұл, үш қыздан 11 немере, 4 шөбере сүйіп отыр. Тоқтарбай Тұрғанұлы өңір жұртшылығына күйші, ақын, сазгерлігімен танымал. Шеберлігі де бар. Жітіқара ауданына арналған әнұранның авторы. Балалары да қара жаяу емес, түрлі аспаптарда ойнап, ән шырқайды. Ал немерелері спорт пен өнерде айтарлықтай жеңістерімен қуантып жүр.
Отбасы күні қарсаңында ҚР Мемлекеттік хатшысы Қырымбек Көшербаевтың қатысуымен онлайн-форматта «Мерейлі отбасы» ұлттық байқауының лауреаттарын марапаттау рәсімі өткен болатын. Қостанай облысының мақтанышына айналған Тұрсыновтар отбасына Президент Қасым-Жомарт Тоқаевтың атынан диплом табысталып, бағалы сыйлықтар берілді.
Суреттерді түсірген Бердіболат КӨРКЕМБАЕВ.
