Бас жоспарлардың тұсауы кесілді
Арқалық, Рудный, Жітіқара және Затобол кентінің жаңа бас жоспарлары жасалып, тұсауы кесілді. Оған облыс әкімінің бірінші орынбасары Е.Аман, облыстық сәулет және қала құрылысы басқармасының басшысы А.Бекенов, сондай-ақ аталған басқарманың аудан, қалалардағы бөлімдерінің басшылары қатысты.
Бүгінде Қостанай облысында жаңа жоспар бойынша жұмыс істеп жатқан тек Қостанай мен Лисаков қалалары ғана екен. Енді келер жылдан бастап Ар-қалық, Рудный, Жітіқара мен Затобол кенті де жаңа жоспар бойынша жұмыстар атқаратын болады. Бұл сызбаларды әзірлеуге жалпы сомасы 236,6 млн. теңге жұмсалыпты. Енді жаңа жоспарлардың арқасында аталған өңірлерде тұрғын үй және әлеуметтік нысандар салу үшін қосымша аумақтар қарастырылып, көгалдандыру мен абаттандыру жұмыстарына да басымдық берілмек. Мәселен, Затобол кентінің жаңа жоспары бойынша шағын және орта бизнес, жеке тұрғын үй, балабақша, мектеп салу үшін арнайы аумақтар қарастырылып отыр. Қостанай аудандық сәулет және құрылыс бөлімінің басшысы Гүлсара Қасыбаеваның айтуынша, жаңа жоспар 2050 жылға дейін арналып әзірленіпті. Бұған 22,5 млн. теңге жұмсалып, бүгінде қаражат толығымен игерілген. Ал, ауданның бас жоспары соңғы рет осыдан 43 жыл бұрын жа-салған екен. Тұжырымдама бойынша сол кездері бекітілген аумақ та толық қамтылған. Жалпы, аудан орталығында баспана тұрғызамын деушілер саны жылдан жылға арта түсуде, ал ол үшін жер тапшы көрінеді. Сондықтан, Затоболдағы "Автомобилистер" қоғамдық бірлестігінің меншігіндегі жер телімдері үй салуға берілмек.
Рудный қаласының да 2046 жылға дейін бекітілген бас жоспары кезең-кезеңмен жүзеге асырылып, шаһардың аумағы Тобылдың оң жағалауына дейін кеңейтілетін болады. Нәтиже-сінде, түрлі әлеуметтік нысандар мен тұрғын үйлер бой түзеп, жаңадан саябақтар салынып, көгалдандыру мен абаттандыруға да ерекше көңіл бөлінбек.
Облыс әкімінің орынбасары Е.Аман да Кеншілер қаласының бас жоспарында бірінші кезекте инженерлік-коммуникациялық жүйелерді қалпына келтіру қарастырылуы қажеттігін алға тартты.
– Бірінші кезекте коммуникациялық жүйелерді қалпына келтіру керек. Себебі, газ, су, жылу құбырлары әбден ескірген, сондықтан осыны да ескеру қажет. Ал, екінші мәселеге тоқталсақ, тұрғын үй құрылысы үшін бос жерлер Қостанай қаласымен салыстырғанда Рудныйда жетіп артылады. Сол себепті бұл мәселеден ешқандай проблема туындамайтыны анық, – дейді облыс әкімінің бірінші орынбасары Е.Аман.
Жаңа жоспардың арқасында Арқалық қаласының да әлеуметтік-экономикалық саласын арттырып, қалаға Родина ауы-лын қосу да жоспарланып отыр. Сондықтан да, қазіргі күні шаһардағы кезінде жабылып қалған шағын аудандардағы үйлер бұзылуда. Болашақта ол жерлерде жаңа құрылыс алаңдары бой көтеріп, әлеуметтік нысандар салынбақ. Сондай-ақ, бұрынғы әуе-жайды қайта қалпына келтіру, көмірмен жағылатын жаңа жылу қазандығын, желмен жұмыс іс-тейтін электр стансасын салу да жоспарда бар.
– Бас жоспардың жобасында тау-кен өндірісін дамытуға да баса ден қойылған. Сондай-ақ, су электр орталығы салынады. Көк-тем мезгілдерінде су тасқынын алдын алу жұмыстары да қарастырылған, – дейді жобаның бас инженері Александр Буреломов.
Ал, керісінше Жітіқара ауданындағы төрт мың гектардай жер кішірейтілетін болады. Себебі, салық салмағын төмендету мақсатында аудандағы "Қостанай минералдары" акционерлік қоға-мы өздеріне тиесілі жер аумағын қаланың сызбасынан алып тастауды сұрапты. Жалпы, Жітіқарадағы құрылыс жұмыстары енді солтүстік-батыс бағытқа қарай жалғасатын болады. Өйткені, бас-қа жерлер халықтың өмір сүруі үшін жарамсыз әрі ластанған көрінеді.
Қарлығаш
ОСПАНОВА
Сурет Алау сайтынан алынды
