Мүмкіндіктер шектеусіз

Қостанайда мүгедек балаларға арналған оңалту орталығы ашылды. Мұнда мүмкіндігі шектеулі жасөспірімдер қалаған спорт түрлерімен айналыса алады. Атап айтсақ, стол теннисі, қол күрестіру, суда жүзу, садақ ату, би спортымен шұғылдануға мүмкіндіктері бар. Сондай-ақ тоғызқұмалақ, асық ойыны сынды ұлттық спорт түрлері де бағдарламаға енгізілген. Орталықта мүгедек балаларды әлеуметтік-тұрмыстық жағдайға бейімдеуге де маңыз беріліп отыр. Сол үшін де компютер тілін игеріп, киім пішіп, іс тігуге үйрететін оқу курстары ашылған. Бұл жоба демеушілердің қолдауымен жүзеге асты.

«Бізде жоба бойынша 25 бала, 25 ана бар. Ол аналарға да көмек керек. Бізге келген балалар, мүмкіндігі шектеулі жандар, сосын аналары келіп, осы жерде көп нәрсеге үйренеді. Компьютерлік кластарымыз бар, жұмысқа, оқуға түсем деп жатқан балалар болса, бұл жағынан да көмектесеміз»,- дейді жобаны үйлестіруші Аруна Жақсағұлова.