Әкім кубогын сарапқа салды

Демалыс күні Жітіқара қалалық «Асбест» мәдениет сарайында жер-жерден келген жайдарманшы жастар Жітіқара ауданы әкімінің кубогын сарапқа салды. Бүгінде берісі жергілікті әкімдер, әрісі Президент жанындағы Жастар саясаты жөніндегі кеңес пен Білім және ғылым Министрлігі мықтап қолға алған көңілді тапқырлар сайысы Қостанай өңірінде де кең етек жаюда. Бұған дәлел халықтың ыстық ықыласына бөленіп, облыс қалаларымен қатар ауыл-аудандарында өткізіліп жатқан жайдарман ойындары.

«Ауылым – алтын бесігім» деген атаумен өткен сайыс Ақтөбе, Рудный, Жітіқара, Жангелді, Таран мен Тобыл кенті жастарының басын қосты. Сәлемдесу, үш жаңалық, үй тапсырмасы сияқты кезеңдерде жайдарманшылар өте тартысты, әрі тартымды ойын үлгісін көрсетті. Нәтижесінде жергілікті команда мен Таран ауданының жігіттері үздіктер қатарынан орын алса, бас жүлде және Жітіқара ауданы әкімінің кубогы Рудный индустриялық институтының намысын қорғаған «Бес саусақ» командасына бұйырды. Барлық командалар алғыс хаттармен және естелік сыйлықтармен марапатталды.

 

Қуаныш Сейдоллаұлы