Көшет – кенттің “жасыл өкпесі”

"Өз өміріңді жасылдандыр". Осындай ұранмен Рудный қаласында көшет отырғызу акциясы өтті. "ССКӨБ" акционерлік қоғамы және "Поколение – Z" қоғамдық қоры бірлесіп, №1 қалалық емхана маңына тал екті. "Медицина қызметкерлеріне пандемияға қарсы күрестегі күнделікті еңбектері үшін алғыс айту және құрмет білдіру белгісі ретінде 20 түп тал отырғыздық. Оларды күтіп-баптау да өз міндетімізде. Көшеттеріміз өркен жайып өсе бастаса, қаламыз жасылданып, көркі кіре түсер еді. Болашақта бұл жерге ақ халаттылар үзілістерде көлеңкеде демалып отырулары үшін орындықтар орнатуды жоспарлап отырмыз", – дейді "ССКӨБ" АҚ Экология және жер қойнауын пайдалану бөлімінің басшысы Анатолий Дворниченко. 
Игі іс-шара соңында барлық қатысушыға мадақтама және экоқоржындар табыс етілді. 
Айта кетейік, экоакция мақсаты – Рудныйдың "жасыл өкпесін" нығайта түсу, бұл міндетке неғұрлым көбірек адам тарту. Бүгінге дейін еріктілер мен қарапайым тұрғындар 800 түптей терек көшетін отырғызған.