Баға, қайда барасың?
Бензин бағасы тағы қымбаттады. Соңғы бірнеше күнде ол орташа есеппен 5-10 теңгеге өскен, деп хабарлайды sputnik.kz.
Ең танымал жанар май құю бекеттерінің ресми сайттарындағы мәліметтерге сәйкес, елордада АИ-92 168−177 теңге, АИ-95 – 188-ден 197 теңгеге дейін, АИ-98 – 186-дан 220 теңгеге дейін көтерілген. Алматыда АИ- 92 литрі 165-171 теңгеден, АИ-95 187-200 теңгеден, АИ-98 191-230 теңгеден сатылып жатыр.
Ал Қазақстанның басқа қалаларында АИ-92 маркалы жанар май бағасы 175 теңге маңайында. АИ-95 бағасы 185-200 теңге аралығында. АИ-98 литрі 175-205 теңгеге өскен.
Елде жанар май бағасы сәуір айынан бастап өсті. Қазақстандықтар бағаның шарықтауына ғана емес, жанар май тапшылығына да шағымданды.
Естеріңізге салсақ, бұған дейін Энергетика министрлігі биліктің жанар-жағар май бағасын неліктен ретке келтірмейтінін түсіндірген еді. Ведомство ол кезде бағаны реттеу және "арзандатылған" мұнай өнімдерімен қамсыздандыру жүйесін құру тиімділігі аз және шығыны көп амал екенін айтқан болатын.
