«1000 және 1 түп ағаш»

Кеше осындай атпен Рудный қалалық «Достық» саябағында экологиялық акция өтті.

«Жастар» қоғамдық бірлестігі мен жастардың ресурстық орталығы ұйымдастырған шара барысында «Мусора. Больше. Нет» экологиялық қозғалысының белсенділері, «Рахат» мемлекеттік мекемесінің қызметкерлері мен қарапайым қала жұртшылығы жасыл желектер отырғызып, саябақ аумағын қоқыстардан тазартты.

«Жастар» қоғамдық бірлестігінің төрағасы Максим Фроловтың айтуынша, әлеуметтік маңызы зор акцияның басты мақсаты – тұрғындардың экологиялық мәдениетін қалыптастыру және дамыту, олардың қоршаған ортаға деген көзқарасын кеңейту.

–Биыл ғана есігін айқара ашқан «Достық» саябағы бүгінде рудныйлықтардың сүйікті демалыс орнына айналып үлгерді. Сондықтан оны мұнтаздай таза ұстап, жасыл желегін арттыру – баршамыздың ортақ міндетіміз, – дейді қалалық еріктілер лигасының көшбасшысы Римма Меңдібаева. «Мусора. Больше. Нет» экологиялық жобасы Қазақстан Республикасының Тұңғыш Президенті қорының қаржылай қолдауымен жүзеге асырылып жатқанын айта кеткен жөн.

 

Қуаныш Есқабыл