Сең қозғалғанша жалғасады
Тобыл өңірінде өзендер мен су қоймаларындағы мұз жару жұмыстары жалғасуда. Сең қозғалғанша жүретін мұндай шаралар су тасқынынан төнетін қауіптің алдын алады.
Облыстық ТЖД қоғаммен байланыс тобының мәліметінше, мереке күндері «NIKSIT» ЖШС мамандары Науырзым ауданындағы Дәмді өзені мен Шолақсай ауылының маңындағы бөгетте жарылыс жүргізген. Сондай-ақ жарушылар жасағы Қарасу ауданы Қарамырза ауылының маңындағы Тінтуір өзені мен Қарасу өзеніндегі мұз кептелісін жойған. Мұз жару жұмыстары Қарасу ауданына қарасты Новоселов ауылынан 3 шақырым жердегі Құндызды өзенінде, Қарасу ауылының маңында, Науырзым ауданындағы Буревестник ауылына жақын жатқан бөгеттерде, Әулиекөл ауданы Көктал ауылының маңындағы Теректі өзенінің сағасында жүріп жатыр.
«Мұздың орташа қалыңдығы 1 метрден асады. Мұз жару жұмыстарына облыстық ТЖД, полиция департаменті мен жергілікті атқару органдарының өкілдері және «NIKSIT» серіктестігінің мамандары қатысуда. Жарылыс кезінде барлық қауіпсіздік шаралары қарастырылды», – деп мәлімдеді Облыстық ТЖД қоғаммен байланыс тобы.
Әлібек Ыбырай
