Өлмегенге өлі балық жолығады
Амангелді ауданында апта бойы із-түзсіз жоғалған малшы табылды! 21 ақпан күні жылқы іздеуге шыққан азамат елсіз жерде табылды. Бұл туралы облыстық төтенше жағдай департаментінің баспасөз қызметі хабарлайды.
Жергілікті шаруа қожалығында жұмыс істейтін 1971 жылы туған Амангелді Тұржанов 20 ақпан күні Амангелді ауданының Бірәлі қыстағынан ығып кеткен жылқыларды іздеуге шыққан. Бірақ ол сол күндердегі қатты боранға тап болады. Оның із-тозсыз кеткені жайында туыстары 21 ақпанда хабар беріпті.
Амангелді аудандық төтенше жағдай бөлімінің жүріп өтімділігі жоғары «Нива Бронто Марш» автокөлігімен 2 қызметкер, жергілікті полиция қызметінің 3 тәртіп сақшысы және жоғалған азаматтың туыстары оны іздеуге шығады. Бірақ көз көрсетпес бораннан еш нәтиже шықпаған екен.
«Боран, бұрқасын, қатты соққан жел мен үздіксіз жауған қар іздеу шараларын айтарлықтай қиындатты. Оның үстіне малшымен байланысу еш мүмкін болған жоқ», – дейді департамент берген хабарламада.
Облыстық ТЖД басшылығы осы сәтте елорданың құтқарушыларына көмекке жүгінеді. Нұр-Сұлтаннан «Қазавиақұтқару» АҚ-ның «Ми-8 АМТ» тікұшағы жөнелтіледі. Ауа райының қолайсыздығына байланысты әуе кемесі Жезқазған қаласында жанармайды толтырып алып, 27 ақпан күні іздеу жұмыстарына кіріседі. Абырой болғанда сағат 11.50-де малшы Қостанай мен Қарағанды облыстары шекарасының Обалы тұрағы маңындағы қамыс ішінен табылыпты. Әбден қалжыраған, қозғалуға дәрмені жоқ. Бір құдыреттің арқасында өзі де, мініп жүрген аты да дін аман. Амангелді Тұржанов қатты боранда жылқы жануарын ықтап қар астында жата берген. Оның бір апта бойы немен қоректеніп, қалай жан баққаны әзірге белгісіз.
«Табылған азамат тікұшақпен Жезқазған қаласының медициналық мекемесіне жеткізілді. Оның денсаулығына еш қауіп төніп тұрған жоқ, ес-түсін біледі, әрі қарай ем-дом алатын болады», – делінген баспасөз хабарламада.
