Президент шыршасы қамкөңілдерді қуантты

Жаңа жыл пандемия кезеңінде де балалар мен ересектердің ең сүйікті, ескерусіз өтпейтін мерекесі болып қала береді. ҚР Президентінің жаңажылдық шыршасына қатысушылар осының жарқын мысалы болды.

Іс-шара карантин талаптарына сәйкес өтті. 9-13 жас аралығындағы жетім балалар, ата-анасының қамқорлығынсыз қалған балалар, мүгедек балалар, аз қамтылған және көп балалы отбасылардан шыққан балалар, дарынды балдырғандар – барлығы 200 оқушы Мемлекет басшысының атынан сыйлық қораптарын алды. Оның ішіне ҚР Президентінің атынан құттықтау ашықхаттары, планшеттер, тәтті сыйлықтар және Ұлы Абай энциклопедиясы немесе қатысушылардың жас шамасына сай қазақ халық ертегілерінің жинағы салынған. Әр балаға берілген сыйлық жиынтығының құны – 100 мың теңге.

Президент шыршасына қатысушылардың бірі – отбасы үлгісіндегі «Жанұя» балалар ауылының тәрбиеленушісі Артем Вельман қуаныш сезімін жасырмады.

«Мен бүгін өте қуаныштымын! Бізді келе жатқан мерекемен құттықтап, сыйлықтар табыс етті. Баршаңызды Жаңа жылмен құттықтағым келеді. Менің балалық арманым орындалғандай, сіздердің де арманыңызға қолдарыңыздың жетуін тілеймін!» – дейді Артем.

Мерекелік іс-шараға Арқалық қаласынан келіп қатысқан балдырғанның анасы Анар Тұржанова да өз әсерімен бөлісіп, ұйымдастырушыларға алғысын айтты.

«Менің қызым тұңғыш рет Президент шыршасына қатысып отыр. Бұл өзімнің де өмірімдегі алғашқы оқиға. Балам мұндай ерекше құттықтаудан үлкен әсер алды. Оның шынайы толқынысын, көзінен қуанышын көрдім. Балаларымызға деген қамқорлықтарыңызға рахмет!  Жаңа жылда ойдағы жоспарларыңыз жүзеге ассын, асыл армандарыңыз орындалсын!", – деді баласының шаттығына бөленген ана.

Енді қала-аудандар әкімдерінің жаңажылдық шыршасы өтпек. Оған жоғарыда аталған санаттардағы 4645 бала қатыстырылады. Әр өңір өздерінің кішкентай тұрғындарын мерекелік сыйлықтармен қуантпақшы. Атап айтқанда, жеткіншектер тәтті тартулар мен бір арнаулы сыйлық (смартфон, велосипед, энциклопедиялар және т.б.) иеленеді.