Еріктілер жылы жабылды
Бүгін еріктілер жылының ресми жабылу салтанаты өтті. Онлайн режимде болған іс-шараға облыс әкімі Архимед Мұхамбетов қатысып, қостанайлық белсенділерді марапаттады.
Өңірде жыл басынан бері 800-ден астам іс-шара өткізіліп, оған 6 мың волонтер қатысқан. Олар қиындыққа тап болған адамдарға көмектесіп, ағаш отырғызу сияқты әртүрлі қайырымдылық жобаларына үлестерін қосты. Елде төтенше жағдай жарияланған сәттен бастап қостанайлық еріктілер белсенді еңбек етті. Медициналық мекемелердің қызметкерлеріне, қауіп төнген және үйде қалуға мәжбүр болған қарттарға дәрі-дәрмек пен гигиеналық құлдарды жеткізуге жәрдемдесті. Жақсылық жасауға асыққан мұндай азаматтар баршаға үлгі.
"Еріктілер төтенше жағдай кезінде дәрі-дәрмектен басқа, мұқтаж адамдарға қажетті азық-түлікті түсіруден бастап, тасымалдауға дейін көмектесті. Қауіпсіздік мақсатында тасымалдау кезінде барлық еріктілер бетперде, қолғап және қорғаныс костюмдерімен қамтамасыз етілді. Еріктілер қозғалысының барлық өкілдеріне бірлескен жұмысы үшін алғыс айтамын", -деді облыс әкімі А.Мұхамбетов.
Салтанатты іс-шараның соңында төрт аталым бойынша жеңімпаздар анықталды. «Корпоративтік еріктілік көшбасшысы» номинациясында «Жыл еріктісі» халықаралық сыйлығына Женгелдин ауданының «Жалын» жастар ұйымы, «Жыл меценаттары» номинациясында «Жомарт жүрек» сыйлығын Борис Князев иеленді. «Жылдың үздік ұйымы» аталымында «Олжа-Агро» ЖШС, «Ерен ерлік» аталымы бойынша Жансейіт Құрманғалиев марапатталды.
Мемлекет басшысы Қасым-Жомарт Тоқаев «Сындарлы қоғамдық диалог – Қазақстанның тұрақтылығы мен өркендеуінің негізі» атты былтырғы Жолдауында 2020 жылды «Волонтер жылы» деп жариялаған болатын. Мінекей, жыл айрығында еріктілердің атқарған жұмыстары қорытындыланып, волонтер жылы ресми түрде жабылды. 
Қымбат ДОСЖАНОВА
Суреттерді түсірген Бердіболат Көркембаев.
