Біздің Қасқырбай
Әріптесіміз Қасқырбай Қойшыманов кезекті жетістігімен қуантты. Есімі «Қостанай облысы жастарының Алтын кітабына» енді.
«Алтын кітапқа» іріктеуге өңірде әр салада еңбек етіп жүрген екі жүзден астам жас қатысты. Үміткерлер есімі әуелі әлеуметтік желіде таныстырылды. Оларға көпшілік Қостанай облысының жастар саясаты мәселелері жөніндегі басқармасының инстаграм парақшасы арқылы дауыс берді. Бұл іріктеудің бірінші кезеңі еді. Одан таңдалған ең мықтыларды байқау комиссиясы талқыға салды. «Журналистика» аталымында қазылар бір ауыздан Қасқырбай Қойшымановты таңдады.
– Ол қарсыластарынан сөзсіз оқ бойы озық тұрды, – дейді комиссия мүшесі, облыстық мәдениет басқармасының басшысы Ерлан Қалмақов. – Қасқырбай қаламы қарымды журналист ретінде өзін көрсете білді. Оның сүйекті сұқбаттары мен сүбелі мақалаларын оқып, сүйсініп отырамыз.
Журналист басылым бетінде маңызды мәселелерге қоғам назарын аударып, азаматтық көзқарасын да батыл білдіріп жүр. Әріптесіміз байқауға «Ой-отау» авторлық жобасын ұсынғанын айтады. Ол осы әңгіме алаңында көптеген танымал тұлғалармен сұқбат құрған еді.
– Мен бақ сынаған «Журналистика» аталымында он шақты үміткер бақ сынады. Еңбегімді бағалап, қазылар жеңісті маған беруді ұйғарыпты. «Алтын кітапқа» есімі енген барша замандастарымды құттықтаймын, – дейді Қасқырбай.
Жұлдызы жанған жас журналистің жетістігі бұл ғана емес. Ол 2017 жылғы «Үздік мақала» облыстық байқауының жеңімпазы. 2018 жылы ҚР Мемлекеттік қызмет істері агенттігі ұйымдастырған «Үздік баспа жарияланымы» номинациясында топ жарды. Ал былтыр «Егемен Қазақстан» газеті өткізген өңірдегі журналистер байқауында бірінші орын иеленді. 2019 жылы «ERG» компаниясы ұйымдастырған журналистер байқауының жүлдегері.
