Жақсы ұстаз – шамшырақ

Мектеп! Өмірімнің бар мақсаты осы сөздің ауқымына сыйып кетерліктей-ақ. Мақсат демекші, тағдырымды ұстаздық жолмен ұштастырып, өзіме білім берген ұстаздармен бір ұжымда  жүрмін. Әрине,  жұмыстың жаманы жоқ. Десек те, қиялыңды асқақтатқан кәсіптің иесі болып, бұйырған несібеңді теріп жеу әркімді өзгеше сезімге бөлейтіні сөзсіз. Әсіресе, бұл орайда мені осы салаға жетелеп, сөз өнеріне баулыған, ана тіліңді ардақтау, еліңді, жеріңді сүюдің  бір белгісі екендігін түсіндіре білген Гүлжанат Жұмабаева  сынды ұстазыммен әріптеспін. ҚМПИ-дың қазақ тілі мен әдебиеті факультетін қызыл дипломмен аяқтап,  ұстаздарымның сенімін бір ақтасам, ендігі арманым шәкірттердің өміріне бағдар сілтеуші ретінде талмай еңбек ету.

Алғашқы еңбек жолымды бастаған білім ордасында жетістіктер де жетерлік. "Парасатты басшылық, мұғалімге жақсылық" демекші, тамыз конференциясында мектеп директоры Қымбат Бірманова қазақ тілін өркендетудегі  қосқан үлесі үшін облыстық төсбелгімен марапатталса, кітапханашы Гүлназ Қасабек "Үздік  педагог" атты мадақтаманы еншіледі. 11 сынып оқушысы Жансая  Мұратбаева  облыста Оралхан Бөкей оқуларынан бірінші орынды иеленіп, республикаға жолдама алды. "Дарынды ұстаздан – дарынды оқушы шығады" деген қағиданы ұстанып, ұстаздарды рухтандырып, жаңашыл бағыт беріп жүрген директордың ғылыми ісі жөніндегі орынбасары Гүлдира Күдесованың  еңбегі.

Гүлбану СӘБИТОВА,

 №7 орта мектебі, жас маман.

Рудный қаласы.