Шаруаларға рұқсат етіледі

Қостанайлық шаруалар  карантинге қарамастан блок-бекеттер арқылы кедергісіз жүріп-тұра алады. Бұл туралы облыстық Ауыл шаруашылығы басқармасының басшысы Жансұлтан Тәукенов айтып берді. Басқарма басшысы ауыл шаруашылығы өндірушілері үшін блок-бекеттерде «жасыл дәліз» жұмыс істейтіндігін ескертті. Бұл көктемгі дала жұмыстарын қалыпты өткізуге мүмкіндік бермек.

– Карантин жағдайында облыста 27 блок-бекет кұмыс істейді. Олар ауыл шаруашылығы тауарларын өндірушілер үшін осындай қадамға барып отыр,- деді Таукенов. – Ауыл шаруашылығы және арнайы техникалар блок-бекеттерден кезектен тыс өтетін болады.

Жеңіл көлікпен жүретін ЖШС, ШҚ тәрізді ауылшаруашылық кәсіпорындарының жетекшілеріне, агрономдарға да  рұқсат етіледі. Олар блок-бекеттерден өткенде жүргізуші куәлігін және жұмыс істейтіндігі жөнінде берілген анықтаманы көрсетуге міндетті.

Аумағында блок-бекеттер орналасқан аудандар мен қалалардың әкімдіктері жүріп-тұрушыларға бектерден 200 метр қашықтықта өту тәртібі туралы ақпараттық стендтер орнатады. Шара көктемгі егісті дайындау мен өткізуге жұмылдырылған барлық адамдарды ұстамауға мүмкіндік береді. Әкімдерге тапсырмалар берілді.

Әлібек ЫБЫРАЙ