Қоғамдық көліктер санитарлық талапқа сай емес
Қазіргі індетке байланысты қоғамдық көліктерге санитарлық өңдеу жұмыстары уақытылы жүргізіліп тұруы тиісті. Осы жұмыстарды бақылау үшін Қостанай қаласында мониторингтік топ құрылды. Оның құрамына Қостанай қаласы әкімдігінің, жолаушылар көлігі және автомобиль жолдары басқармасының, жергілікті полиция қызметінің және тауарлар мен қызметтердің сапасы мен қауіпсіздігін бақылау органының өкілдері кірген.
19 наурызда барлық қалалық көлік тасымалдау өкілдеріне санитариялық-эпидемияға қарсы іс-шараларды ұйымдастыру туралы хабарламалар жіберілген. Бұл іс-шараларға сай әрбір рейстен кейін жуу және дезинфекциялау құралдарын қолдана отырып, әр ауысым сайын еденді кемінде 2 рет жуып, дезинфекциялау құралдарын қолдана отырып, автобус салонын өңдеп, салондарда коронавирустық инфекцияның таралуының алдын алу бойынша көрнекі ақпарат ілініп тұруы қажет болатын. Бұдан басқа, автобус жүргізушілері де жеке бас гигиенасын сақтауға міндетті. Бүгін арнайы топ мүшелері Президент Жарлығының орындалуын тексеріп, екінші рет рейдке шықты.
"Жарық жол-1" ЖШС қарасты №24 бағытындағы автобусты тексеру кезінде мынадай келеңсіздіктер анықталды:
– қоғамдық автокөліктің іші дезинфекциялау құралдарымен өңделмейді;
– автокөлік құралдарының барлық жүргізушілері жеке бас гигиенасын сақтамайды. Арнайы маскалары, қолғаптары жоқ.
– салонда коронавирустық инфекцияның таралуының алдын алуға сай ақпарат ілінбеген;
– автобустардың отырғыштары (тігілген маталар) дезоөңдеуден өтпеген. Бәрін айтпағанның өзінде осы жұмыстарды атқару үшін қажетті деген арнайы құралдардың өзі жоқ.
Автобустары тексерілген барлық жүргізушілер бақылау органдарының өкілдерінен қауіпсіздікке қажетті санитарлық-эпидемиологиялық сараптама жүргізу қажеттілігі туралы хабарлама алды. Сонымен қатар, Президенттің Жарлығы орындалмаған жағдайда автокәсіпорындардың басшыларына әкімшілік хаттама жолдап, ол бойынша ескерту немесе әкімшілік айыппұл, болмаса 15 тәулікке дейінгі мерзімге әкімшілік қамауға алу көзделген.
Айтолқын АЙҚАДАМОВА
