Тиімді төлем, ұтымды ұсыныс
Облыс әкімі Fly-Arystan әуе компаниясының рейсін ашты
Алғашқы отандық лоукостер Fly-Arystan Нұр-Сұлтан-Қостанай-Нұр-Сұлтан бағытында күнделікті қатынайтын рейсін ашты. Елордадан келушілерді облыс әкімі Архимед Мұхамбетов қарсы алып, баспасөз конференциясын өткізді.
– Бүгінгі тарихи жаңалықпен барлықтарыңызды құттықтаймын. Fly-Arystan әуекомпаниясының ұшағы алғашқы рейсін жасады. Бұл – бюджеттік әуе компаниясы. Тұрғындарға тиімді тарифтер қарастырылған. Бір бағыттағы билет құны 6 мың теңгенің шамасында. Ұшақ билетінің құны төмен. Бұрын соңды Қостанай облысында мұндай баға болмаған. Сол себепті қостанайлықтардың атынан әуекомпания басшысы Фостер мырзаға алғысымды айтамын. Бұл бір жағынан өңірге келетін туристерге де ыңғайлы. Біз 40 жылға жуық жөнделмеген ұшу-қону жолағын қайта жаңарттық. Қазір ұшу-қону жолағының ашылғанына бір айдан асты. Біріншіден, жолақ ұзарып, кеңейе түсті. Бұрын оның ұзындығы 2,5 шақырым болса, қазір 2,8 шақырым. Ені де 45 метрден 60 метрге дейін ұзарды. Салмағы шамамен 200 тонналық ұшақты қабылдауға қауқарлы, – деді облыс әкімі.
Компанияның сату және маркетинг бөлімінің директоры Жанар Жайлауованың сөзінше, қазірдің өзінде желтоқсан айына билеттер сатылып қойған. Жалпы осыған дейін лоукостер 600 мыңнан астам жолаушыны тасымалдаған.
Сонымен, лоукостер компаниялар қызметінің бағасы соншама арзан болуының сыры неде? Біріншіден, олар шығынды барынша үнемдеуге тырысады. Мәселен, билеттер онлайн режімде сатылатындықтан, арнайы әуе кассаларының қызметі пайдаланылмайды. Ұшақ билетін сатқаны үшін комиссиялық ақы алынбайды. Сондай-ақ жолаушыларға ұшақта тамақ берілмейді. Берілсе, ол үшін жеке ақы алынуы, бағасы қымбаттау болуы мүмкін. Бортсерік секілді ұшақ қызметкерлері әмбебап болып, бірнеше адамның жұмысын қатар алып жүре алады.
– Күнделікті екі бағытта қатынайтын ұшақ рейсін көп күттік. Билет құнының арзандығына орай ақшаңызбен қатар уақытыңызды да үнемдейсіз. Бір жарым сағат ішінде қалаған бағытыңызда бола аласыз. Ұшаққа өзіңізбен 5 келі салмақтағы жүгіңізді тегін алып кіре аласыз ал, 15 келіге дейін жүгіңіз үшін 1500 тг қосымша қаражат төлейсіз. Ұшақ билеттерінің ең төменгі құны – 5999 теңге. Билетке қазірден-ақ лоукостер сайты арқылы тапсырыс беруге болады. Компания ақпаратынша, Қостанай-Нұр-Сұлтан бағытына 180 орынға шақталған Airbus A320 ұшақтары қызмет көрсетеді, – деді Жанар Жайлауова.
Елордадан ұшып келген Қонысбайлар отбасы да лоукостер тиімділігін айтты.
–Fly-Arystan әуекомпаниясының ұшағында барлық жағдай жасалған, ең бастысы, билет құны арзан. Бізді Қостанай облысының әкімі Архимед Мұхамбетов күтіп алды. Ұшақтың қызмет көрсету сапасын сұрап білді. Ол кісімен естелік суретке түстік. Борт-серіктері жоғары деңгейде қызмет атқарды,– дейді Маржан Қонысбай.
Қасқырбай ҚОЙШЫМАНОВ
Суреттерді түсірген Бағдат Ахметбеков
