AIMAQTA QANDAI HABAR BAR?
Oblysta. "Qazaqavtojol" dıspecheri keıbir baǵyttardaǵy joldardyń jabylatyny týraly habarlady. Sonyń ishinde, "Qostanaı-Qarabutaq" tas jolynyń Jaıylma aýylynan Aqtóbe oblysy shekarasyna deıingi ýchaskesi ýaqytsha jabyldy. Sebebi, qazirgi ýaqytta bul aralyqta jańbyr jaýyp tur. Kóktaıǵaq qaýpi seıilgenshe jabyq bolmaq.
Qostanaı. Mereke alyndaǵy kezekti jármeńke 14 jeltoqsanda bolady. Saýda-sattyq sharasy ádettegishe "Emshan" SÚ mańyndaǵy jabyq pavılonda 9.00-de bastalady. Buǵan qala-aýdandardyń taýar óndirýshileri qatyspaq. Turǵyndar úshin et, sút, shujyq, makaron ónimderi, un, jumyrtqa, qant, kókónis-jemis, maı jáne ózge de azyq-túlik arzan baǵamen satylady.
Qos aýylda gaz qosyldy
Denısov. Aýdan ortalyǵyna jáne Nekrasov aýylyna gaz berildi. Kógildir otyrmen qamtý jumystary 2017 jyly bastalǵan edi. Oǵan oblys qazynasynan 474 mln teńge bólindi. Gaz qubyrynyń jalpy uzyndyǵy 22 shaqyrym bolady. Sondaı-aq osy jyly Pereleskı aýyly da gaz ıgiligin kórgen-tin. Aýdan oblysta gazben qamtý jóninen kósh bastaýshy óńirler qatarynda.
Rýdnyı. İz-tússiz joǵalyp ketken 13 jasar oqýshyǵa eki aptaǵa jýyq izdeý salynǵan edi. Jetkinshek osy ýaqytqa deıin qalaǵa jaqyn mańdaǵy Iýbıleınyı aýylynda bolǵan. Onyń densaýlyǵy jaqsy, qazirgi ýaqytta ata-anasyna tapsyryldy. Balany izdestirýge jedel top qurylǵan. Eriktilermen birlesken top izdeý sharalaryn ótkizdi.
Amangeldi. Aýdan ortalyǵyndaǵy úsh balabaqsha búldirshinderine búdjet qarajatynan bólingen 2 mln teńgege oıynshyqtar áperildi. Tárbıeshilerdiń aıtýynsha, syıǵa tartylǵan barlyq oıynshyq ekologıalyq jaǵynan qaýipsiz ári qazirgi zaman talaptaryna saı. Búldirshinderdiń qýanyshynda shek joq.
Áýlıekól. Úıde bolǵan órt 3 jáne 1 jastaǵy balanyń ómirin jalmady. Boljam boıynsha, órt balalardyń abaısyzdyǵynan tutanǵan. Bul ýaqytta olar úıde qaraýsyz qalǵan. Analary mektepten úlken qyzyn ákelýge ketip, páterdi syrtynan jaýyp ketken. Bul – bıylǵy jylytý maýsymynda bolyp otyrǵan 11-shi qaıǵyly oqıǵa.
Qaýipsizdik belgileri qoıyldy
Arqalyq. "Arqalyq-Torǵaı" tas jolynda bolǵan joıqyn jol apatynan soń qosymsha jol belgileri qoıyldy. Eki jaqty baǵytqa qoıylǵan belgilerdiń jalpy sany 14-ke jetedi. Olardyń qatarynda "Aınalyp ótýge tyıym salynady", "Tik kóterilim", "Jyldamdyq shekteýleri" sekildi eskertpeler bar. Mamandar bul avtojolǵa áli 50 shaqty belgi qoıý qajettigin anyqtap otyr.
