Аудандағы тұңғыш супермаркет

Әулиекөл ауданында "Азия" супермаркетінің ашылу салтанаты өтті. Бұл туралы аудан әкімдігінің "Фейсбук" желісіндегі парақшасында жазылды.Жаңа сауда орнының иелеріне аудан әкімі Ерлан Теменов ізгі тілегін білдірді. Оның айтуынша, кәсіпкер Дамир Қалиев ғимаратты жөндеуге, жабдықтар мен тауарлар сатып алуға 23 млн теңге жұмсаған. Ерлан Олжабайұлы атап өткендей, мекеме басшылығымен жаңа дүкенде азық-түлік нарықтық бағадан 5-10% төмен бағамен сатылады. Бұл – тұрғындар үшін, оның ішінде, зейнеткерлерге жақсы көмек.Аудан басшысы мен супермаркет директоры қызыл лентаны қиып, қонақтарға шашу шашылып, бауырсақ пен тәттілер үлестірілді.
"Мені жаңа супермаркеттегі бағалар таң қалдырды, – дейді зейнеткер Зәуреш Алпыспаева. – Бұл жерде сауда жасау басқа дүкендерге қарағанда арзан болады. Мен жақын тұрамын, өте ыңғайлы. Супермаркет үзіліссіз  жұмыс істейді екен. Ғимарат өте әдемі, заманауи. Сауда-саттықта табыс тілеймін".
"Біздің ауылда супермаркет ашылғанына өте қуаныштымыз, – дейді аудан орталығының тұрғыны Жеңісгүл Қуанбаева. – Барлығы бір жерде – азық-түлік, тұрмыстық химия, келушілер үшін ыңғайлы, жылы, жайлы. Бағалар әлі салыстырылмаған, бірақ олар төмен деп ойлаймын".
Супермаркет иелері уәде еткендей, 7 мың теңгеден астам сомаға тауар сатып алған алғашқы жеті тұтынушыға кепілді сыйлықтар табыс етілді.