Дәнді өлкенің думаны
Меңдіқара ауданының диқандары Ауыл шаруашылығы күнін атап өтті. Кең көлемді мәжілісте осы жылғы еңбек қорытындыланып, саланың үздік қызметкерлері марапатталып, еңбек ардагерлеріне құрмет көрсетілді.
Жер-ана төсін емген меңдіқаралық шаруалар осы жылдың қолайсыздау ауа райына қарамастан, анағұрлым молырақ өнім алған табысты үш өңірдің қатарынан көрінді. Бұл жайында салтанатты шарада сөз алған аудан әкімі Нұрлан Қатарбеков мәлімдеді.
"Биыл қалыптасқан межеден үш есе аз жауын-шашын түсті. Соған қарамастан біздің ауданның шаруалары өздерінің нағыз маман екендіктерін дәлелдеді. Астықтың орташа шығым көлемі гетарына 12 центнерді, ал майлы дақылдар 5 центнерді көрсетті. Анағұрлым ауқымды нәтижеге "Орлан", "Береке таң", "Қарқын", "Раскөл" секілді серіктестіктері ие болды. Бұл инновациялық технологияны қолданудың, танаптарды кеңейтудің арқасында мүмкін болды. ", – деді ол.
Аудан диқандары биыл мемлекеттің 1,5 млрд теңгеден астам субсидиясына қол жеткізген. Оған 2 мың тонна элиталық тұқым, 4,5 тонна минералды тыңайтқыш алыныпты. Сондай-ақ, техникалық база да жаңартылған. Осы жылы 1 млрд теңгеден астам қаржы жұмсалып, жаңадан 28 трактор,7 комбайн және 96 өзге де заманауи техника егін науқанына қосылған. Ауыл шаруашылығымен қатарлас, ауданда шағын бизнес те дамып келеді. Мәселен, "Еңбек" бағдарламасы аясында 55 меңдіқаралық өз ісін бастаған. Бұған 230 млн теңге жұмсалыпты.
Баяндаманың соңында аудан әкімі қыр төсінде бел жазбай еңбек еткен шаруаларды, сала мамандарын Ауыл шаруашылығы министрлігінің, облыстық басқарманың, аудан әкімдігінің алғыс хаттарымен марапаттады. Сахна төріне Сайран Бұқанов, Орал Таңжарықов секілді елге белгілі еңбек ардагерлері шығып, дәстүрлі жиынға жиылған қауымды төл мерекелерімен құттықтады.
"Меңдіқара өңірі Ауыл шаруашылығы саласындағы өз беделін ешқашан аласартып көрген емес. Ұдайы алдыңғы қатарда келеді. Біз қазір егін егуді, астық оруды барынша меңгеріп алған жұртпыз. Қуантатыны – қазір өз ісін кәсіби түрде меңгерген мамандар, білікті басшылар қатары өте көп. Сондықтан табыстардың әлі алда екеніне кәміл сенемін. Кәсіби мерекелеріңіз құтты болсын, – деп лебіз білдірді Еңбек Ері Сайран Балкенұлы.
Берекені көктен емес, еткен еңбектен тілеген шаруагерлердің құрметіне концерттік бағдарлама ұсынылды. Облыс орталығынан арнайы келген "Ақжелең" ұлт аспаптар оркестрі, танымал әнші Арыстан Құрманов және жергілікті өнерпаздар мереке иелеріне ән-күйден шашу шашты. Ақ тілектер легі "Бәйтерек" дәмханасында жайылған ақ дастархан басында жалғасын тапты.
