Үздіктер марапатталған күн

Жітіқара ауданында бірнеше жыл қатарынан өңірдің ғана емес, облыстың да мәдениеті мен спорт саласының дамуына сүбелі үлес қосып, кәсіби тұрғыда жетістіктерге жетіп жүрген майталмандарды салтанатты марапаттау шарасы дәстүрлі түрде өткізіліп келеді. Айтулы шара биыл да жалғасын тауып, қос саланы дамытуға қосқан үлесі мен мінсіз еңбегі үшін бір топ үздіктер зор қошемет пен марапатқа ие болды.

Биылғы жыл жітіқаралықтар үшін көптеген ірі мерекелік концерттермен және спорттық бәсекелермен есте қалды. Сондықтан, салтанатты марапат басталмай тұрып, үлкен сахнадағы экраннан аудан абыройын асқақтатқан шараларға шолу жасалды. Одан кейін саналы ғұмырын мәдениет пен спорт саласына арнап, бүгінде бейнеттің зейнетін көріп отырған ардагерлерге де сый-құрмет көрсетілді. Ал, мұнан кейін сахна төріне көтерілген аудан әкімі А.Ибраев жиналған қауымды дәстүрлі мерекемен құттықтап, сала майталмандарына сәттілік тілеп, алғыс жаудырды.

-Ағымдағы жыл ауданымыз үшін ерекше жыл болды. Біздің сүйікті қаламыз 80 жылдық мерейтойын атап өтті. Әрі бұл мерейтой “Тың-Целина-2019” спартакиадасымен тұспа-тұс келіп, қос мереке де өте жоғары деңгейде өтті. Және бір қуанышты жаңалық, биыл “Жітіқара-арена” спорт кешені іске қосылды. Біздің қаламыздың мәдениет және спорт қызметкерлері осы айтулы шараларда өздерінің биік кәсіби шеберліктерін дәлелдеп, ауданымыздың тұрғындарына керемет естен кетпес мереке сыйлады.
 Сондықтан осы қос мерекені ерекше салтанатпен атап өтуде көп еңбек сіңірген сіздерге айтар алғысымыз зор, – деді аудан әкімі А.Ибраев.

Мұнан соң  көп жылғы адал еңбегі және аудан мәдениетінің дамуына қосқан зор үлесі үшін осы саланың ардагерлері Т.Хохлова, М.Полуляк, Л.Михайлова, сондай-ақ, мектеп оқушылары мен колледж студенттері арасында футбол, хоккей бойынша облыстық спартакиаларда бірнеше дүркін чемпиондарды тәрбиелегені үшін жаттықтырушы Виктор Лоцман “Жітіқара қаласына – 80 жыл” мерейтойлық медалімен марапатталды. Сонымен қатар, ауданның мәдениеті мен спортын дамытуға қосқан үлесі және жоғары кәсіпқойлығы, мінсіз еңбегі үшін 310 мәдениет қызметкері, 244 спорт саласының майталмандары Жітіқара ауданы әкімінің алғыс хатымен және ақшалай сыйлығына ие болды. Ал, бұл мақсатқа 2 млн теңгеден астам қаражат жұмсалған көрінеді.

 

 

Аудандық мәдениет сарайының қызметкерлері мен шығармашылық өнерпаздары әзірлеген концерттік бағдарлама салтанатты шараның көрігін қыздыра түсті.

Суреттерді түсірген Б.КӨРКЕМБАЕВ