AIMAQTA QANDAI HABAR BAR?
Oblysta. Bıyl "Eńbek" baǵdarlamasyn júzege asyrýǵa 9 mlrd teńge bólindi. Qazirgi tańda bul somanyń 6,5 mlrd teńgesi ıgerilgen. Osy qarjyǵa 25 myń adam jumysqa ornalasyp, arnaıy bilim aldy. Al shaǵyn nesıemen qamtý úshin 1,3 mlrd jumsalyp, 67 startap-joba iske asqan. Nesıelendirilgenderdiń 49%-i – názik jandylar.
Kórshi elmen onlaın–baılanys
Arqalyq. Y.Altynsarın atyndaǵy ArqMPI Fızıka-matematıka kafedrasynyń oqytýshylary men stýdentteri Krasnoıarsk qalasynda ótken «Matematıka jáne matematıkalyq bilim berýdegi aqparattyq tehnologıalar» atty VIII búkilreseılik ǵylymı-ádistemelik konferensıaǵa qatysty. Munda atalmysh pánniń búgini men bolashaǵy, ǵylymdaǵy róli talqylandy. Onlaın-májiliste arqalyqtyq ǵalymdar ǵylymı baıandamalar jasady.
Rýdnyı. SSKÓB-tiń Qashar kentindegi ótkelinde 20 shaqyrymdyq temir jol kúrdeli jóndeýden ótti. Kúni keshe ǵana qurylysshylar azdaǵan ýaqyt kidiristen soń eń aqyrǵy ýchaske – 675 metr qashyqtyqty aıaqtap shyqty. Salynǵaly jóndeý kórmegen shoıyn jolynyń tasymal jumysyna oń yqpaly bola túseri sózsiz.
Áýlıekól. Amanqaraǵaılyqtar aýyl sharýashylyǵy kúnin atap ótti. Dástúrli meıramda eńbekkerlerge qurmet kórsetildi. “Áýlıekól-Roz”, “Aman-Tersek” jáne “Amanqaragaı elevatory” JSHS-teri oraq naýqany qorytyndysyn jasap, úzdik jumysshylardy marapattady. Oblysqa tanymal ónerpazdar olarǵa án-kúıden shashý shashty.
Taran. Oqıǵa Áıet aýylynda bolǵan. 29 jastaǵy áıel janjal barysynda ózimen birge turatyn er adamnyń keýde tusyna pyshaq urǵan. Sonyń saldarynan er adam oqıǵa ornynda qaza tapty. Osy derekke qatysty sotqa deıingi tergeý sharalary júrgizilip jatyr.
Qostanaı a. «Halyq únine qulaq asatyn memleket» tujyrymdamasyn ilgeriletý aıasynda jalpy respýblıkalyq is-shara – Azamattardy biryńǵaı (ulttyq) qabyldaý kúni ótkiziledi. Aýdanynyń aýyldyq okrýgter, aýyldar, Zatobol kentiniń ákimderi halyqpen tikeleı dıalog ornatady. Qabyldaý 21 qarashada aýdan boıynsha ótpek.
Zańsyz et satpaq bolǵan
Qarasý. Tártip saqshylary zańsyz et tasymaldaǵan Jalǵyshan aýylynyń turǵynyn ustady. Zań buzýshy "Qarasý-CHýrakov" avtojolynda qolǵa túsken. 53 jastaǵy er adam tıisti qujatsyz bólshektep soılyǵan 4 shoshqany satý maqsatynda jolǵa shyqqan. "Mal urlyǵy" jele aldyn alý sharasy aıasynda 50-den astam kólik toqtatyldy.
