AIMAQTA QANDAI HABAR BAR?
Jańa ortalyq ashylmaq
Qostanaı q. Oblys ortalyǵynda jastar bolashaǵy ortalyǵy paıda bolady. Ony erekshe qajettilikteri bar adamdar úshin ashady. Onda 18-den 40 jasqa deıingi árbir adam odan ári jumysqa ornalasý úshin jańa bilim ala alady. Erekshe qajettilikteri bar adamdardy qostanaılyq "Raýan"qoǵamdyq birlestigi oqytpaq.
Jalǵan aqsha kóbeıdi
2011 jylǵy úlgidegi nomınaly 5000 teńgelik jalǵan banknottardy tabý oqıǵalary jıilep ketti, dep habarlady Qazaqstan Ulttyq Banki. Qarjy ınstıtýtynyń habarlaýynsha, jasandy banknottardyń deni 5547994 serıaly. Aqsha qorǵalǵan qaǵazda kompúterlik tehnıkany paıdalana otyryp jasalǵan, onda banknottardyń barlyq beti boıynsha geometrıalyq fıgýralar túrindegi sý belgileri bar. Sondaı-aq olarda samuryq mıftik qus túrindegi sý belgisin ımıtasıalaý bar.
Ardagerler baq synasty
Qarasý. Iskra aýylynda sport ardagerleriniń 2-shi jazǵy spartakıadasy ótti. 6 komanda fýtbol, basketbol, voleıbol, ár túrli qashyqtyqqa júgirý, uzyndyqqa sekirý, doıby, shahmattan jarysqa tústi. Aıtýly sharaǵa aýyldyń 50 turǵynynyń qatysqanyn aıta ketken jón.
Halyqpen kezdesti
Altynsarın. Novoalekseevka aýylynda "Patrıotızm, rýhanı kelisim jáne beıbitshilik-toleranttylyq ustanymdary" taqyrybynda Din máseleleri boıynsha aýdandyq aqparattyq– túsindirý toby músheleriniń halyqpen kezdesýi ótti. Kezdesýdiń maqsaty men mindeti jastardyń dintaný saýattylyǵyn qalyptastyrý, destrýktıvti dinı aǵymdardyń qyzmeti, sonyń ishinde ekstremıstik jáne terorıstik turǵydan aqparattandyrý, etnosaralyq jáne konfesıaaralyq kelisimdi nyǵaıtý, jastardyń patrıottyq jáne rýhanı-adamgershilik sanasyna tárbıeleý bolyp tabylady.
Tárbıe – tal besikten
Denısov. Ortalyq aýdandyq balalar kitaphanasynyń qyzmetkerleri «Solnechnyı» KMM jazǵy lagerinde demalýshy kishi mektep jasyndaǵy balalarǵa arnalǵan «Úlken tabıǵattyń kishkentaı keremetteri» atty tanym jáne jańalyqtar saǵatyn ótkizdi.
Balalar elektrondy vıktorına suraqtaryna belsendi jaýap berdi, jumbaqtar sheshti. Tabıǵatta ózin-ózi ustaý erejeleri qaıtalandy. İs-sharanyń maqsaty balalardyń tabıǵatqa uqypty jáne qurmetpen qaraý týraly túsinikterin qalyptastyrý.
Esirtki alyp ótpek bolǵan
Qarabalyq. «Qaıraq» keden beketinde shekaradan 7 gram marıhýana ótkizbek bolǵan er adam ustaldy. Serjant Erlan Shaıkenov ony Maııa esimdi ıttiń kómegimen ustapty. İz kesýshi ıt er adamnyń joǵarǵy oń jaq qaltasyna nusqap, tyıym salynǵan zatty meńzegen kórinedi. Er adam Qarabalyq aýdanynyń polısıa bólimine tapsyryldy.
Aýa raıy qubylmaly
Oblysta. Sınoptıkterdiń boljamynsha, 1 tamyzda frontaldyq bólikterdiń ótýine baılanysty Qazaqstannyń basym bóliginde qubylmaly aýa raıy saqtalady, elimizdiń keı jerińde jańbyr jaýyp, naızaǵaı jarqyldaıdy, batysta jáne soltústik batysta qatty nóser jaýady. Tek respýblıkanyń ońtústigi men shyǵysynda kún raıy ashyq bolady. Keı jerde jel kúsheıedi, daýyl, shańdy daýyl kútiledi, burshaq jaýýy múmkin. Qostanaı oblysynyń keı jerinde burshaq jaýýy múmkin, túnde jel 15-20, kúndiz 15-20 keı jerlerde 23-25 m/s kútiledi.
