Нәтиже жаман емес
Ұлттық бірыңғай тестілеудің облыстағы орташа балы 88,9 пайыз болды. Мектепті үздік бағамен тәмамдаған 186 оқушының 146-сы «Алтын белгі» атағын қорғай алды. Ал өңіріміздің 50-ден астам түлегі 130-дан астам ұпай жинаған. Биылғы көрсеткіш өткен жылғыдан 2,2 балға жоғары. Сондай-ақ, 1 түлек тестілеуді ағылшын тілінде тапсырған.
-Ұлттық сынаққа биыл 2785 түлек қатысты. Бұл – мектеп бітірушілердің 58 пайызы. Олардың 1429-ы тест сұрақтарына мемлекеттік тілде жауап берсе, 1355-і білім сынағын орыс тілінде тапсырған. Сынақ тапсырған түлектердің ішінде 100 балдан жоғары жинағандар мыңнан асады. 43 оқушы өз мүмкіндігін 134 балға жеткізді. Ал, 2430 бала берілген 140 сұрақтың 121-інен көбіне жауап беріп, ұстаз үмітін ақтады. Көш басында дарынды балаларға арналған Ыбырай Алтынсарин мектебі тұр. Орташа нәтиже – 119 балл,- деді облыстық білім басқармасы басшысының орынбасары Айжан Баймақанова.
Айта кетейік, сынақ кезінде ең жоғары нәтиже – 136 балды Арқалық қаласындағы Ы.Алтынсарин атындағы гимназиясының оқушысы Асқарбек Нұрзаман жинаса, 134 балды 7 оқушы, 133 балды 12 оқушы еншілеген.
Биылғы ҰБТ-ға қатысушылардың қауіпсіздігін қамтамасыз ету мақсатында арнайы автобус бөлінген. Шалғай аудандардан 1888 түлек тест тапсыру бекетіне жеткізілсе, 466-сы жататын қонақ үйлермен қамтамасыз етілген.
Түлектердің жоғары оқу орындарына түсуіне мемлекет тарапынан үлкен қамқорлық көрсетілуде. Осы жылы өңіріміздің талапкерлеріне 65 мыңға жуық грант бөлінбек.
Шұға Аңсағанқызы
