Педагогикалық идеялардың үздігі
Қостанай қаласындағы Назарбаев зияткерлік мектебі директоры орынбасары Рашит Тәтімбеков 4-6 наурызда Алматы қаласында өткен Республикалық «Педагогикалық идеялар фестивалі» байқауында 1-орынды иеленді.
Жыл сайын өтетін фестиваль Қазақстан Республикасының «Білім туралы» Заңын, Қазақстан Республикасында білім беруді дамытудың 2022-2026 жылдарға арналған тұжырымдамасын іске асыру мақсатында ҚР Білім министрлігінің «Дарын» орталығымен әзірленді.
Фестивальға директорлар, директордың орынбасарлары, білім беру ұйымдарының барлық педагогтері, мектепке дейінгі ұйымдардың тәрбиешілері мен әдіскерлері, музыка қызметкерлері, қосымша білім беру педагогтері, сынып жетекшілері, психологтар, логопедтер, дарынды балалармен жұмыс жасайтын өңірлік орталықтардың әдіскерлері қатысты. «Назарбаев Зияткерлік мектептері» ДББҰ құрама командасы Республикалық педагогикалық идеялар фестиваліне 7 жұмыс ұсынып, оның ішінде алты мұғалім жүлделі орындарға ие болды.
– Мен «Білім берудегі менеджмент» секциясында «Цифрлық басқару: сабақты бақылау жүйесі» тақырыбы бойынша сабақты бақылау жүйесін әзірлеу жұмысын ұсындым. Ұйымдастырушылар мен қатысушылардан көптеген пікірлер кері байланыс алдым. 1-орын біздің жалпы командалық жетістігіміз деп санаймын, себебі мұндай тәжірибе республикада еш жерде жоқ, – дейді Рашит Тәтімбеков.
