Әріптестер марапатталды

by Qostanaı tańy · 26.06.2019

Бүгін Байланыс және ақпарат қызметкерлері күні қарсаңында облыстық БАҚ өкілдері марапатталды. Есімі ардақталған өңірлік журналистика саласы мамандарының қатарында әріптестеріміз де бар.

Кәсіби мерекеге арналған шара облыстық Медиафорумнан басталды. Бұл жиынға облыс әкімі Архимед Мұхамбетов қатысты. Республикадан белгілі мамандар – Black and White медиа-агенттігінің директоры Р.Балғынбаев және ҚР Тұңғыш Президенті-Елбасы Қорының баспасөз хатшысы, журналист О.Лоскутова арнайы шақыртылған. Мемлекеттік орган басшылары, танымал журналистер, өңірлік БАҚ редакторлары бас қосқан пленарлық отырысты облыстық "Қостанай таңы" газетінің Директоры-Бас редакторы Ж.Аязбеков жүргізіп отырды.

"Құрметті Байланыс және ақпарат саласының қызметкерлері! Сіздерді кәсіби мерекелеріңізбен шын жүректен құттықтаймын! Билік пен халықтың алтын көпіріне айналып, азаматтық қоғамның іргесін бекітуге өңір журналистерінің сіңірер еңбегі зор (…). Жаңалықтарыңыз жағымды, қаламдарыңыз қарымды болсын!" – деді құттықтау сөзінде аймақ басшысы.

Бұдан әрі спикерлер қазіргі журналистиканың негізгі трендтері, БАҚ пен әлеуметтік желілер, олардың рөлі мен қоғамдағы маңызы туралы баяндамалар жасады. Тақырыптық талқылаулардан соң өңір журналистерін марапаттау рәсіміне кезек берілді. Облыс әкімінің қолынан мерекелік марапат алған мамандар қатарынан әріптестеріміз де көрінді. Атап айтқанда, газетіміздің бас редакторы Жанұзақ Аязбеков "Ақпарат саласының үздігі" аталымы бойынша сыйлыққа ие болды. Сондай-ақ, қарашаңырақ редакторының орынбасары Жұматай Кәкімжановқа "Құрмет грамотасы" табысталды. Аға редактор Әлібек Ыбырай Қазақстан Журналистер одағының грамотасымен ардақталды. Тілшіміз Қыдырбек Қиысханға Мұхамеджан Сералин атындағы сыйлық бұйырса, басылымымыздың аға редакторы Қазақстан Журналистер одағының грамотасымен марапатталды. Редакциямыздың кезекті жүлдесі фототілші Бердіболат Көркембаевқа "Көзмерген" аталымы бойынша берілді. Әріптестерімізді шын жүректен құттықтаймыз!