Отбасы – өмір аясы

"Отбасы – ошақ қасы" демекші, мен үшін отбасы қасиетті ұғым. Көктерек негізгі мектебінде оқып жүргенімде әр түрлі іс-шаралар болып тұратын. Отбасы күнін ата-аналарымызбен бірге тойлайтынбыз және өте қызықты болатын. 

Ал қазір аудан орталығындағы Ғ.Жұмабаев атындағы орта мектебіне оқуға келгелі әр күнім қызықты өтуде. Жаңа достар таптым. Алғашқы қоңырау соғылғалы мерекелердің ішінде ең тартымдысы – отбасы апталығы дегім келеді. Отбасы – қасиетті құндылық. Адам баласына берілетін тәрбиенің ең негізгі осы отбасында қалыптасады. Талайды қанаттандырған киелі шаңырақ – отбасы. Сондықтан, отбасы мерекесі күні белгіленуінің өзіндік маңызы бар. Осы мереке күні біздің  қара шаңырағымыз – Ғ.Жұмабаев атындағы орта мектебінде "Отбасы – өмір аясы" тақырыбында апталық өтіп жатыр. Өскелең ұрпақты тәрбиелеу кезін-де отбасылық салт-дәстүрлерді қолдау және дамыту,  оқушылардың көркемдік шығармашылығын насихаттау, балалардың бойында патриотизм және отбасылық құндылық сезімдерін ояту – ұстаздарымыздың басты мақсаты болды. Шараны мектеп директоры  Нұргүл  Утеулина бастап ашып берді.

Қазақта: "Отан отбасынан басталады", – деген дана сөз бар. Шынында да, адам баласы үшін Отаннан кейінгі қасиетті ұғым – отбасы болса керек. Отбасы – Отанның әрбір мүшесін дүниеге әкеліп, қанатын қатайтып, қатарға қосатын маңызды ұя. Данышпанның да, ғалымның да ең алғашқы тәлімі мен тәрбиесі осы үйде қаланған. Жанұяның береке-бірлігі әр сәбидің, әр баланың болашақ қадамы. Өйткені, ұяда не көрсең, ұшқанда соны ілесің. Міне, осы мерекеге барлық ата-аналар, көненің көзі ата-әжелер немере-шөберелерімен бірге сабаққа қатысып, топ-топтарға бөлініп, әр түрлі сайыстар өткізді. Ата-әжелер немерелерімен бірге жүгіріп, доп ойнағаны тіпті қызық болды.

Сынып сағаттарында отбасы туралы айтылған қазақтың мақал-мәтелдерін талқылап,ата-аналарымыз жайында өте керемет әндер шырқадық. Маған оқу жылының басталуы өте қатты ұнады.

  Алтынай Серікбаева,

 Ғ.Жұмабаев атындағы орта мектептің 

10 сынып оқушысы.

Меңдіқара ауданы.