«Қызғалдақ» экспозициясы ашылды

Арқалықтағы Дала өлкесі тарихы облыстық музейіндеҚР Тұңғыш Президенті Н.Ә.Назарбаевтың «Ұлы Даланың жеті қыры» мақаласы аясында «Көктем көркі – қызғалдақ» атты тұрақты экспозициялық көрме ашылды.

 

Көрменің ашылу салтанатына өлкетанушы, Арқалық қаласының құрметті азаматы Шөптібай Байділдин менЫ. Алтынсарин атындағы Арқалық мемлекеттік педагогикалық институтының «Химия, биология және география» кафедрасының меңгерушісі, PHD докторы Қарлығаш Қоразбекова құттықтау сөз сөйлеп, лентасын қиды.

"Елбасымыз өзінің тарихи мақаласында атап көрсеткендей, қазақ даласы алма мен қызғалдақтың тарихи отаны екендігі ғылыми тұрғыда дәлелденген. Қазақ топырағындағы осынау қарапайым әрі ерекше гүлдер өзінің әдемілігімен көптеген халықтың жүрегін баурап, біртіндеп бүкіл әлемге тарады. Бүгінде жер жүзінде қызғалдақтың 3 мыңнан астам түрі бар, олардың басым көпшілігі – біздің дала қызғалдағының өскіндері", – дейді көрмемен таныстырған музейдің ғылыми қызметкері Гүлсім Ғабдулина.

Тағылымды шарада ақындар Молдатай Жапарұлы «Қызғалдақ бекеті», Батырлан Сағынтаев «Қызғалдақ ғұмыры – Құралай салқыны» атты өлеңдерін оқыды.

Іс-шараны музей директоры Асхат Хасенов қорытындылап, «Рухани жаңғыру» бағдарламасының өскелең ұрпақ үшін берер тәлімі мен тәрбиесі зор екендігін алға тартты.

 

Мұрат Жүнісұлы