Кекілдерін жел тараған (ФОТОРЕПОРТАЖ)

Қостанай ауданының Заречный ауылындағы «Арғымақ» ипподромында ат бәйгесі өтті.

 

Биылғы ат спортының ашылу салтанатына билік өкілдері, ардагер спортшылар және қостанайлықтар мен қонақтар жиналды. Бәйге басталмас бұрын облыс өнерпаздары қалың қауымға ән-күйден шашу шашты. Ізін ала, ұлттық ойындар – «Қыз қуу», "Жамбы ату" және "Аударыспақ" басталды. Мұнда әуесқой спортшыларға бақтарын сынап көруге мүмкіндік ұсынылды.

 

Бұдан әрі жиылған жұрттың назары тай жарыс пен құнан бәйгеге ауды. Сәйкесінше, сәйгүліктер төрт және алты шақырымға шапты. Көптің делебесін көкпар ойыны одан сайын қоздыра түскендей. Білектілер бәсекесіне облыс аудандарының командалары қатысты. Финалда Қостанай ауданының спортшылары әулиекөлдіктерді ұтты. Үшінші орын Денисов ауданының көкпаршыларына бұйырды.

Ал аламан бәйгеге Қазақстанның барлық облысы және Ресейден келген бапкерлер шашасына шаң жұқпаған сәйгүліктерін сөреге айдады. Қашықтық – 16 шақырым. Бұл бәйгеде 11 жастағы алматылық Нұрболат Сүнетайдың бабы мен бағы келісті. «Шекер» есімді тұлпары мәрені бірінші кесті. Жеңімпаз «Лада Гранта» темір тұлпарын тақымға басты. 

 

Суреттерді түсірген Бердіболат Көркембаев