Мердігердің заңсыз әрекеті әшкереленді
2013 жылы Федоров аудандық сәулет, қала құрылысы және құрылыс бөлімі «Компания Ерлан» ЖШС мердігеріне аудан орталығындағы таратып беруші желіні қалпына келтіру жұмыстарын атқаруға келісім жасасады. Құрылыс жұмыстарының сомасы да аз емес – 1,9 млрд. теңгені құрайды. Мердігер компания екі жылға жоспарланған жұмыстың 2013 жылы 700 млн., ал биылғы жылы 1,2 млрд. теңгесін игеру қажет болған.
Алайда былтыр мердігер жоба-сметалық құжатқа өздігінен өзгеріс енгізіп, сол үшін мемлекет қаражатынан қосымша тағы да 73 млн. теңге қаржы сұрайды. Бұған дейін облыстық экономикалық істер жөніндегі мамандандырылған соты «Компания Ерлан» ЖШС мердігер компаниясының арызын қанағаттандырып, Федоров аудандық сәулет, және құрылыс бөлімінен серіктестіктің пайдасына 46 млн. теңге өндіріп беру туралы шешім шығарады. Алайда бұған облыстық прокуратура наразы болып, облыстық сотқа шағым түсіреді.
– Апелляциялық сотта жоба-сметалық құжат мемлекеттік сараптамадан өтпей қалғандығы белгілі болды. Демек, мердігер компанияның бұл жұмыстарды жүргізуге құқығы болмаған, – деді облыстық прокуратураның ресми өкілі Анар Мейрамова.
Шұға Қоңқабай
