ЖЕҢІСТІҢ 74-ші КӨКТЕМІ (фоторепортаж)

by Qostanaı tańy · 09.05.2019

Бүгін – Жеңіс күні! Екінші дүниежүзілік соғыстың аяқталғанына 74 жыл. Әрі азалы, әрі қуанышты датаны қостанайлықтар жылдағыдай лайықты деңгейде атап өтті.

Ұлы Жеңісті атап өтуге арналған шаралар Қостанай қаласының орталығында басталды. Алаңға жиналған тұрғындар әуелі "Батырлар, сіздерге мың алғыс!" атты театрландырылған қойылымды тамашалады. Бұдан соң облыс әкімі Архимед Мұхамбетов мерекелік құттықтауын жолдады.

"…Миллиондаған адамның өмірін қиған сұрапыл соғыстың аяқталғанына бүгін тура 74 жыл толып отыр. Екінші дүниежүзілік соғыс 1700 қала мен кентті күйретті, бірнеше мың кәсіпорын істен шықты. Бірақ, аталарымыз бен әжелеріміздің арқасында бейбіт күн кешіп отырмыз. Соғыс кезінде қостанайлықтардың да алдыңғы шепте жүргенін мақтанышпен айта аламыз. Облысымыздан 73 мыңнан астам сарбаз соғысқа аттанды. Солардың 24 мыңнан астамы ұрыс алаңдарында, 3,5 мыңы госпитальдерде алған жарақаттарынан қаза болды. Тағы 16 мыңға жуық солдат хабарсыз кетті. 500 қазақстандыққа "Кеңес Одағының батыры" атағы берілсе, соның 40 батыры – Қостанайдан… Айта кету керек, сол сұрапыл жылдарда Қазақстанға ондаған әскери зауыт көшірілді, оларда ер адамдар ғана емес, әйелдер, қарттар, балалар жанқиярлықпен еңбек етті. Соғыс жылдарындағы барлық ауыртпалық солардың иықтарына түсті. Тек Қостанайға ғана 10 кәсіпорын мен мекеме жіберілді. Облыс орталығына бірнеше госпиталь көшіріліп, Сталинград әскери-авиация училищесі орналастырылды. Біз, қостанайлықтар мақтан тұтар ерлер аз емес. Соғыс пен тыл бейнетін көрген жандардың барлығын батыр десек артық емес,- деді Архимед Мұхамбетов. – Құрметті қостанайлықтар! Шаңырағы биік, іргесі берік елде тату-тәтті өмір сүріп келеміз. Отанымызда бейбітшілік құсы мәңгі қалықтасын. Сіздерді Ұлы Жеңістің 74 жылдық мерекесімен шын жүректен құттықтаймын!

Бұдан әрі "Мәңгілік полк" азаматтық-патриоттық акциясы жария етілді. Қолдарына сұм соғыстың куәгері болған ата-әжелерінің суретін ұстап шыққан қостанайлықтар қалың шепке қосылып, орталық алаңнан бастап, Баймағамбетов көшесі бойымен жылжыды. Шеру басында билік өкілдерімен бірге, Қостанай қаласында тұратын 50 ардақты ардагердің үшеуі – Қасымхан Алдабергенов, Михаил Подоляков және Иван Руденко жүрді. Тағы 25 қарт майдангер бірден мәңгілік алау басына баруды жөн таныған. Ал қалғандарының мерекені көппен бірге қарсы алуға денсаулықтары мұрша бермепті…

Шеру Жеңіс саябағына келіп аялдады. Отан үшін шайқаста шаһит болған қостанайлық жауынгерлер тізімі жазылған мемориалға гүл шоқтары қойылды. Тағзым ету рәсімі "Ерліктері ғасырлар бойы ұмытылмайды" атты салтанатты митингпен жалғасты.

Айта кету керек, биыл Жеңіс саябағында жөндеу жұмыстары жүріп, 40 шақты қостанайлық майдангердің бюсті орнатылған болатын. Облыс әкімінің бастамасымен іске асқан жобаға 100 млн теңге жұмсалды. Қола мүсіндердің бұған дейін қайсысы кімдікі екені белгісіз-тін. Бүгін саябаққа ұйысқан қостанайлықтар ескерткіштерге зер салып, есімдерімен танысып жатты. Парк ішіндегі бір емес, екі сахнада ән-күй әуеледі. Әлеумет әскери, патриоттық әуендердің әсеріне бөленіп, табиғат аясында солдаттар ботқасынан ауыз тиіп, көрнекі көрмелерді тамашалады.