Министр Федоров аудандық ауруханасында болды

Бүгін ҚР Денсаулық сақтау министрі Елжан Біртанов Федоров аудандық орталық ауруханасын аралап, дәрігерлермен жүздесті.

Министрді дәрігерлердің жұмыс кестесі мен еңбекақы көлемі қызықтырды. Белгілі болғандай, аудандық аурухана дәрігерлерінің жүктемесі үлкен, бір маманға екі-үш учаскенің жауапкершілігі ілінген. Мәселен, жалпы тәжірибе дәрігері Светлана Павлюк нормадан артық жұмыс істеп, ал жалақыны стандартты алып отырған көрінеді. Сондай-ақ, ауданда кадр тапшылығы да сезіледі. Аудандық орталық аурухананың бас дәрігерінің айтуынша, өңірге сегіз маман жетіспейді. Дегенмен, денсаулық сақтау басқармасының ақпараты бойынша, өңірде кадр тапшылығы мәселесі біртіндеп шешілуде. Өткен жылы Қостанай облысына 101 жас дәрігер келіп, оның 70-і қалада қалып, 31-і ауылға барған. Министр дәрігерлерді тарту үшін аудан әкіміне әлі де тұрғын үй мен көтермеақы мәселесін  шешуді тапсырды.

Ал, дәлізде емделушілермен әңгімелескен министр олардың бірінің қолындағы дәрігердің қабылдауына жазылған талонды алып көрді. Сырқаттардың бірі дәрігердің қабылдауына бір сағаттан кейін, ендібіреуі тіпті кешкі 5-тер шамасында кіретін болып шықты. Министр “Бұл ыңғайсыз ғой, неге алдын ала жазылмайсыздар немесе сall-орталыққа хабарласпайсыздар ма?” дегенде сырқаттардың дені ауылдан келгендерін айтты.

– 21-ғасырда өмір сүріп жатырмыз дейміз, ал сіздер әлі емделушілерге дұрыс жағдай жасай алмай келесіздер. Келушілерді тар дәлізде сабылтпай, олар үшін ыңғайлы жағдай жасаңыздар, электронды табло орнатаңыздар. Тіпті, арнайы күту залын орнатуға болады ғой.   Сall-орталықтар не үшін? Адамдарды үнемі кезек күту мәселесі алаңдатады. Әрине, мынадай аядай ғана дәлізде төрт сағат бойы күтіп отырса, оған дәрігер де көмек бере алмайды ғой, – деді министр.