AIMAQTA QANDAI HABAR BAR?
Alda – egis naýqany
Oblysta. Bıyl 5,2 mln gektar alqapqa dán sińirý josparlanyp otyr. Onyń 4 mln gektary bıdaıǵa tıesili. Tuqym, tyńaıtqysh jetkilikti, dıqandardy janar-jaǵar maımen qamtý júrgizilýde. Tehnıkalyq daıyndyq pysyqtalyp jatyr. Naýqan jyldaǵydaı 15-mamyrǵa qaraı bastalmaq. Bıyl arpa alqaby 337 myń, jem-shóp tanaby 25 myń, kókónis egistigi 129 myń gektarǵa ulǵaımaq. 
Borysh óteýge daıyn
Qostanaı. 16-17 jastaǵy bozbalalardy dástúrli áskerı tizimge alý bastaldy. Málimet boıynsha, azamattyq boryshyn óteýge jaramdylar sany, ázirge, myńǵa jetip otyr. Olardyń densaýlyǵy ǵana emes, bilimi de tekserilgen. Qatarlarynda QR Qorǵanys mınıstrliginiń oqý mekemesine túsýge tilek bildirgender bar. Olar 18-ge tolysymen áskerge shaqyrtylmaq.
IT-bólme ashyldy
Taran. Novoılın orta mektebiniń oqýshylary 3D-modeldeýge mashyqtana alady. Qurylǵylardy jergilikti mesenattar alyp berdi. Oǵan 1,1 mln teńge shyǵyndalǵan. Bolashaqtyń tehnologıasy 3-synyptan bastap úıretiledi. Tek sabaq kezinde ǵana emes, qosymsha fakúltatıv arqyly qalaǵan oqýshy ıgere almaq.
Daıyndyq búginnen bastalady
Amangeldi. Aýdandyq mádenıet jáne tilderdi damytý bóliminiń qyzmetkerleri "Ulttyq dombyra kúnine" daıarlyqty bastap ketti. Merekege oraı 1000 adamdyq fleshmob uıymdastyrylmaq. Sol sharanyń arnaıy logotıpine baıqaý jarıalanyp otyr. Eń tartymdy logotıp avtoryna baǵaly syılyq taǵaıyndalǵan.
