Aımaqta qandaı habar bar?
Tazalyqshylarǵa alǵys
Rýdnyı. Qalalyq «Nur» meshiti «Rahat» JShS jumyskerlerine arnaıy dastarhan jaıdy. Olar qala tazalyǵy úshin kún saıyn, táýlik boıy, mereke kúnderi de tynbastan eńbek etedi. Meshittiń bas ımamy Azamat Serikbaıuly halyq atynan olarǵa alǵysyn jetkizdi. Sonymen qatar, ıslam dinindegi tazalyqtyń mańyzyn túsindirip, ýaǵyz-nasıhattar aıtty.
Qaladan bizdiń nege ketedi?
Lısakov. Byltyr qaladan 470 turǵyn kóship ketken. Bul 2017 jylǵydan júz adamǵa artyq. Kóp jaǵdaıda olardyń basym bóligi Reseıdi tańdaıdy eken. Ishinara AQSh jáne OAR-na jol túrgender bar. Barlyǵy jaıly turmys pen jaqsy jumys tapqandaryn alǵa tartqan. Al endi qalaǵa qonys tebýshilerdiń kóbi – Taran, Denısov, Qamysty aýdandarynyń taıaý eldi mekenderinde turǵandar.
Teńbil dop torda týlaǵan
Qostanaı a. Aqsý qalasynda shaǵyn fýtboldan halyqaralyq týrnır aıaqtaldy. Oǵan Aqsý ferroqorytý zaýytynyń júldesi tigilgen edi. Jarysqa 2008-2009 jylǵy balalar qatysty. "Zatobolets 2008" BJSM komandasy bas júldeni utyp aldy. Olar eldiń jáne Reseıdiń qalalarynan kelgen 17 komandadan basym tústi.
Artyq bilim kitapta…
Amangeldi. Aýdan ortalyǵyndaǵy kitaphanalar "Bir el – bir kitap 2019" aktsııasyna daıyndyqty bastap ketti. Bıylǵy shara Ábish Kekilbaevtiń "Ańyzdyń aqyry" men Ábdildá Tájibaevtyń poetıkalyq shyǵarmalaryna arnalmaq. Qalamgerlerdi nasıhattaý úshin aýdandyq ortalyq balalar kitaphanasynda "Tulǵalardy ulaǵattaý – el mereıi" atty kórme jasalady. Turaqty kórme oqyrmandar men kórermenderin jyl boıy qabyldaıdy.
Ajaly aǵasynan keldi
Qarabalyq. Aýdan ortalyǵynda áldebir er adamnyń múrdesi tabylǵany týraly jergilikti turǵyn polıtseılerge habarlaǵan. Tergeý sharalarynan keıin belgili bolǵandaı, marqum ajaly óz baýyrynan kelgen. Ekeýi úılerinde iship-jep, sońy tóbeleske ulasypty. Jan aıaýsyz janjaldyń aqyry orny tolmas ókinishpen aıaqtalǵan. Tártip saqshylary tergeý amaldaryn jalǵastyryp jatyr. 
