Жылдың үздік ұйымдары

Қостанайда «Үздік ҮЕҰ-2018» облыстық байқауының қорытындысы шығып, жеңімпаздары марапатталды. 
Бұл байқауды ҮЕҰ-дың ұзақ жылдан бергі басты серіктесіне айналған облыстық ішкі саясат басқармасы ұйымдастырды. Дәстүрлі сайыс биыл тоғызыншы рет өтіп отыр. Биылғы байқауда алғаш рет мүмкіндігі шектеулі адамдармен жұмыс істейтін ҮЕҰ арасында үздіктер анықталды. Қазіргі күні облыста мүгедектерді оңалту және қолдау бағытында елуден астам ҮЕҰ жұмыс істейді. Мұндай ұйымдар астықты аймақтың барлық аудан, қалаларында кездеседі. 

Облыстық байқауға 7 аталым бойынша 30 өтініш түскен. Алдын ала бекітілген комиссия мүшелері ҮЕҰ-дың жыл бойғы атқарған жұмыстары сарапқа салып, үздіктерін анықтады. Комиссия шешіміне сәйкес, «Аманкелді ауданының жастар кеңесі» ҚБ, «Денсаулық жолы-1» ҚБ, «Ақ-Ниет» ҚБ, «Жастар» ҚБ, «Қостанайдың жас көшбасшылары» ҚБ, «Қазақстандағы репродуктивтік және жыныстық денсаулық жөніндегі қауымдастық» ҚБ, «Ожерелье зеленых практик» ҚБ облыстың үздік ҮЕҰ-ы атанды. Мүгедектермен жұмыс істейтін ұйымдар арасында «Радуга» мүгедек балалардың аналары» ҚБ, Жітіқара ауданының мүгедектер қауымдастығы» ҚБ, «Арқалық қалалық мүгедектердің ерікті қоғамы» ҚБ, «Қарабалық аудандық мүгедектердің ерікті қоғамы» ҚБ және Жанат Омаровтың бастамашыл тобы жеңіске жетті.   

-Биылғы жылы ҮЕҰ заңнамасына өзгерістер еніп, әлеуметтік-мемлекеттік тапсырыстың нақты стандарты белгіленді. Мұның бәрі ҮЕҰ-дың қызметін дамытуға арналған іс-әрекеттер. Азаматтық секторға деген халықтың сенімі жыл сайын артып келеді. Жақында жүргізілген әлеуметтік зерттеулердің қорытындысы бойынша, тұрғындардың 65%-нің ҮЕҰ қызметін жоғары бағалайтыны белгілі болды. Үшінші секторға мемлекеттік органдар тарапынан да жақсы көзқарас қалыптасқан,-деді ішкі саясат басқармасы басшысының міндетін атқарушы Зәуре Бәйменова. 

 

Қымбат ДОСЖАНОВА

Суретті түсірген Бердіболат КӨРКЕМБАЕВ.