Н.Назарбаев: «Алыстағы ағайыннан, іргедегі көршің жақын…»

Қазақстан және Ресейдің ХҮ өңіраралық әріптестік форумы барысында Нұрсұлтан Назарбаев пен Владимир Путин «Бәйтерек» ғарыштық-зымырандық кешенін таныстыру шарасында болды. Содан кейін қос елі басшылары пленарлық отырысқа қатысу үшін Қызылжарда жаңа салынған Оқушылар сарайындағы Медиа-сити орталығына келді. Мұнда оларды Теспиан есімді робот қарсы алды. Теспиан – ағылшын тілінен аударғанда «драмалық актер» дегенді білдіреді екен. Заманауи құлтемір 17 тілде еркін сөйлей алады.

 

Медиа-сити орталығында жылдамдығы жоғары онлайн-интернетпен қамтылған16 кабинет бар. Қазақстан мен Ресейдің әр өңірінен келген 250-ден астам журналистің медиа-орталықтың бас мәжіліс залына сыймағаны екі ел басшыларының қатысуымен өткен пленарлық отырысты осы кабинеттерде отырып, тікелей бақылады. Алқалы жиынға арқау болған басты мәселе – қос ел туризмін ынтымақтаса отырып ілгерілету. Туризмді дамытудың жаңа жолдарын айқындап, қос тарапқа бірдей қолайлы әрі тиімді үрдіс қалыптастыру. Жиынға шамамен 500-дей адам қатысты. Оның тең жартысы ресейлік министрліктер мен ведомство өкілдері және солтүстік көршіміздің 22 аймағының жетекшілері мен ірі кәсіпорын басшылары. Олар туризм саласында әріптестік және іскерлік ынтымақтастықты орнату туралы 80-нен астам келісім-шарт жасасады.

Пленарлық отырыс Қазақстан Республикасының Президенті Н.Назарбаевтың құттықтау сөзімен ашылды. Елбасы қос ел арасындағы жағрапиялық жақындықты тиімді пайдалану керектігін, бүгінде қос ел арасындағы экономикалық байланыстың мейлінше нығайғанын айтты: Қазақстан – Ресей арасындағы тауар айналымы 11 млрд доллар. Жыл соңына дейін бұл көрсеткіш 18 млрд долларға жетпек. Бүгінде екі елдің 9 мыңнан астам кәсіпорны ынтымақтастықта жұмыс істейді». Ресей Президенті В. Путин екі ел арасындағы аралас-құраластықтың жоғары деңгейде екендігіне тоқталып, бірлеске туристік жобаларды қолға алу маңызды екенін айтты.

Қос тарап екі елдің шекаралас аймақтарында 100-дің үстінде туристік маршрут әзірлеуге уағдаласты. Алқалық отырыстан соң екі ел көшбасшылары бірқатар бірлескен құжаттарға қол қояды.